Իտալիայի վարչապետ Ջորջիա Մելոնին Բեյրութում հանդիպել է Լիբանանի վարչապետի պաշտոնակատար Նաջիբ Միքաթիի և խորհրդարանի խոսնակ Նաբիհ Բերրիի հետ՝ գրում է Reuters-ը։
Նաջիբ Միքաթիի և Մելոնիի համատեղ մամուլի ասուլիսում կողմերը համաձայնել են, որ դիվանագիտական լուծումը պետք է գերակայի բռնությանը:
Մելոնին ճեպազրույցի ժամանակ կոչ է արել ուժեղացնել Լիբանանում ՄԱԿ-ի խաղաղապահ առաքելությունը, որը հայտնի է որպես UNIFIL: Մելոնին դատապարտել է խաղաղապահների վրա կատարված վերջին հարձակումները՝ դրանք համարելով անընդունելի: Իտալիայի վարչապետը վստահեցրել է, որ Մերձավոր Արևելքի ճգնաժամը ԵՄ ղեկավարների քննարկումների կենտրոնում է:
Լիբանանում ՄԱԿ-ի խաղաղապահ առաքելությունը հայտարարել է, որ վերջին օրերին ենթարկվել է մի քանի «կանխամտածված» հարձակումների իսրայելական ուժերի կողմից, և պատերազմական գոտում գտնվող գյուղերի խաղաղ բնակիչներին օգնելու ջանքերը խոչընդոտվում են իսրայելական հրետակոծությունների պատճառով: Հաղորդվում է, որ հարավային Լիբանանում հինգ խաղաղապահ է վիրավորվել Իսրայելի հարվածների հետևանքով:
ՄԱԿ-ի առաքելությունը տեղակայված է Լիբանանի հարավում՝ Իսրայելի հետ սահմանազատման գծի երկայնքով մարտական գործողությունները դիտարկելու համար: Այդ տարածքում այս ամիս կատաղի բախումներ են տեղի ունենում իսրայելական զորքերի և «Հըզբոլլահի» զինյալների միջև:
