Կառավարությունը հաստատեց Հայաստանի Հանրապետության կառավարության 2023 թվականի դեկտեմբերի 28-ի N 2346-Ա որոշման մեջ փոփոխություններ և լրացումներ կատարելու մասին նախագիծը։
«Օրակարգային այս հարցով տրամաբանորեն ամփոփում ենք պետություն-մասնավոր գործընկերություն շրջանակներում ՀՀ քաղաքացուն նոր ձևաչափով կենսաչափական անձնագիր և նույնականացման քարտեր տրամադրելու մրցութային վերջին փուլը և, ըստ էության, առաջարկում ենք նախագծով հաստատել երկորդ փուլի, այսինքն՝ առաջարկի հարցման ներկայացման բոլոր մանրամասները, այդ թվում՝ վերջնականացված պայմանագրի նախագիծը, ինչպես նաև տեխնիկական պահանջները»,- ասաց ներքին գործերի նախարարի տեղակալ Արփինե Սարգսյանը։
«Ինչպես նշել էի, 3 որակավորված հայտատուներ ունենք՝ միջազգային բարձր հեղինակություն ունեցող, որից երկուսը՝ կոնսորցիում, մեկը՝ անհատ կազամկերպության ձևաչափով։ Շուրջ 5 ամիս մենք, ըստ ընթացակարգի, պետք է բանակցություններ վարեինք այս 3 որակավորված հայտատուների հետ, որպեսզի կարողանայինք նաև փոխընդունելի ձևակերպումներ ունենալ ամբողջ մրցույթի պայմաններում, և նշեմ, որ ուրախալի է այն փաստը, որ մենք ի վերջո կարողացել ենք այս բանակցությունները ճիշտ ժամկետում ամփոփել, և սրա արդյունքներով այսօր քննարկմանը ներկայացված է պայմանագրի այն նախագիծը, որը մի կողմից՝ իրագործելի է, իսկ մյուս կողմից՝ բարձր ստանդարտներ է երաշխավորում պետության անունից»,- նշեց նա։
Արփինե Սարգսյանի խոսքով՝ Կառավարության հաստատումից հետո՝ հոկտեմբերի 8-ին, գնահատող հանձնաժողովը կհաստատի առաջարկի հարցման ամբողջ բնութագիրը։ «Հոկտեմբերի 10-ին արդեն մենք կհանրայնացնենք այս տեղեկատվությունը, դրանից հետո արդեն մասնակիցները հնարավորություն կունենան հայտերը ներկայացնելու, հայտերի ներկայացման համար մինչև 2025 թվականի հունվարի 10-ը հայտատուները ունեն հնարավորություն։ Հունվարի 11-ից սկսած մենք արդեն սկսելու ենք բուն գնահատման պրոցեսը հենց գնահատող հանձնաժողովի կողմից և, ըստ էության, 80 օր ժամկետ ունենք, որպեսզի կարողանանք ամփոփել ամբողջական տվյալները։
2025 թվականի մարտի վերջին մենք կունենանք հաստատված հաղթող ընկերություն՝ ըստ ներկայացրած առաջարկների, և նրան կտանք ժամանակահատված, որպեսզի ներդնի ենթակառուցվածք և սկսի արտադրությունը»,- ասաց նա։
Նախարարի տեղակալն ընդգծեց, որ պրակտիկ առումով բիոմետրիկ անձնագիրը անձի նույնականացման առումով մեզ կտա բարձր ստանդարտ, որը թույլ կտա հարաբերվել նաև այլ պետությունների հետ։ «Այս նոր համակարգը թույլ կտա հստակ բիոմետրիկ տվյալների հավաքման և համադրման արդյունքում կրճատել այն հերթերը, որոնց մեր քաղաքացիները բախվում են օդանավակայաններում, արագ սպասարկում ունենալ և ի վերջո հասնել նրան, որ տարբեր երկրների միջև փոխգործակցության արդյունքում ավելի արժանապատիվ ճանապարհորդելու իրավունք կարողանան մեր քաղաքացիներն ունենալ։
Սա տալիս է շատ լավ նախադրյալ՝ ունենալու էլեկտրոնային կառավարման գեյթ ասվածներով անցնելու հնարավարություն, որովհետև անձինք կարող են անձը հաստատող այս փաստաթղթերով շատ արագ, առանց անգամ սահմանապահի հետ հաղորդակցության, անցնել սահմանային անցման կետերը»,- նշեց Արփինե Սարգսյանը։
