Կառավարության սեպտեմբերի 26-ի նիստին քննարկման ներկայացվեց Հայաստանի Հանրապետության՝ 2025 թվականի պետբյուջեի մասին օրենքի նախագծի վերաբերյալ Կառավարության օրենսդրական նախաձեռնությունը:
Որոշման նախագիծը ներկայացնող ՀՀ ֆինանսների նախարար Վահե Հովհաննիսյանը նշեց, որ որոշ փոփոխություններ ու լավարկումներ են կատարվել նախագծում: Առաջին կետը վերաբերում է կապիտալ ծախսերի՝ հաջորդ բյուջետային տարիներ տեղափոխելու մեխանիզմի հետ: Մեկ այլ փոփոխություն վերաբերում է բազմամյա պարտավորությունների գծով տեղեկատվության բացահայտմանը, այն է՝ մեկնարկի և ավարտի տարեթվեր, ընդհանուր և մնացորդային արժեքներ, 2025 թվականին նախատեսվող ծախսերի մեծություններ:
«Դա հնարավորություն կտա ԱԺ բյուջետային քննարկումներում ծախսային միջոցառումները՝ ինչպես նախկինից շարունակվող, այնպես էլ նոր մեկնարկող, դիտարկել ողջ կենսացիկլի մեջ՝ հաշվի առնելով դրանց ազդեցությունը հետագա տարիների վրա»,- ասաց նա:
Ֆինանսների նախարարն անդրադարձավ նաև հիմնական ֆինանսական ցուցանիշներին:
«2025 թվականի ՀՆԱ-ն կանխատեսվել է 11 տրիլիոն 50 մլրդ դրամ, տնտեսական աճը՝ 5,6 տոկոս, ՀՆԱ-ի դեֆլյատորը՝ 3,5 տոկոս, միջին գնաճը՝ 3,5 տոկոս: Պետական բյուջեի եկամուտները նախատեսվում են 2 տրիլիոն 873 մլրդ դրամ, որից հարկային եկամուտները՝ 2 տրիլիոն 760 մլրդ դրամ: Հարկային վարչարարության բարելավման, ստվերի դեմ պայքարի, ինչպես նաև հարկային քաղաքականության միջոցառումների արդյունքում ակնկալվում է ապահովել հարկեր-ՀՆԱ հարաբերակցության բարելավում՝ 2024 թվականի հաստատված բյուջեի համամատ՝ 0,1, իսկ 2024-ի սպասողականի համեմատ՝ 0,7 տոկոսային կետով՝ հասնելով Կառավարության ծրագրով սահմանված 25 տոկոս թիրախին»,- ասաց նա:
Պետական բյուջեի ծախսերը նախատեսում են 3 տրիլիոն 482 միլիարդ դրամ, որից ընթացիկ ծախսերի գծով՝ 2 տրիլիոն 749 միլիարդ դրամ, իսկ կապիտալ ծախսերի գծով՝ 733 մլրդ դրամ: Ընդ որում՝ կապիտալ ծախսերը նախատեսվում են պատմական մակարդակներից զգալիորեն բարձր մակարդակում՝ տնտեսական և անվտանգային ենթակառուցվածքների ամրապնդման համար:
«Կապիտալ ծախսերի կշիռը ՀՆԱ-ում 2025-ին կհասնի 6,6 տոկոսի, ծախսային քաղաքականությունը կրթության, առողջապահության և սոցիալական պաշտպանության լրացուցիչ նախաձեռնություններով և համակարգային բարեփոխումներով ուղղված է լինելու մարդկային կապիտալի առավել արդյունավետ զարգացմանը և իրացմանը, իսկ պետական ենթակառուցվածքներում, մասնավորապես՝ կրթական և նախակրթական հաստատություններ, ճանապարհներ, ջրամբարներ և այլն, ներդրումներ իրականացնելու միջոցով ֆիզիկական կապիտալի կուտակմանը:
Ծախսային քաղաքականությունը միտված է լինելու նաև պաշտպանական համակարգի ամրապնդմանը՝ բարձրացնելով երկրի դիմադրողականությունը հնարավոր ռիսկերի հանդեպ»,- ասաց նա:
Պետական բյուջեի պակասուրդը նախատեսվում է 609 մլրդ դրամ: Ըստ զեկուցողի՝ 2025 թվականի առկա բյուջետային շրջանակը կառուցվել է պետական բյուջեի կապիտալ ծախսերի բարձր մակարդակի սահմանմամբ, որի ազդեցությունն իր վրա կրում է պետբյուջեի պակասուրդը, որը աճում է մինչև 5,5 տոկոսի 2025 թվականին՝ այնուհետև միջնաժամկետում նվազելով մինչև պարտքի բեռը կայուն պահող 3 տոկոսի մակարդակի: Արդյունքում Կառավարության պարտք-ՀՆԱ ցուցանիշը 2025-ի վերջում կկազմի 53,5 տոկոս:
Փոխվարչապետ Մհեր Գրիգորյանը նշեց, որ նախագիծն առավել մանրամասն կքննարկվի Ազգային ժողովում:
