Ամառային հանգստի ևս մեկ սեզոն անցյալում է: Սևանա լճի ավազանում և հարակից տարածքներում ավարտվել է ջրային պարեկների և փրկարարների ուժեղացված ծառայությունը։ Այն իրականացվում էր պարեկային մեքենաների, նավերի ու սկուտերների միջոցով, ինչպես նաև հետիոտնային հատվածներում։ Այդ մասին հայտնում են ՆԳՆ-ից:
Դրոնով եռալեզու իրազեկում, մոտորանավակներով շրջայց, համակարգված և արդյունավետ աշխատանք. փրկարարների ու պարեկների համագործակցությունը ստացված է՝ ունենք դեպքերի կտրուկ անկում։
Կարող ենք նաև արձանագրել, որ հասարակական կարգն ու հանգստացողների անվտանգությունը բարձր պատասխանատվությամբ պահպանելու արդյունքում ուժեղացված ծառայության ընթացքում հանրային լողափերում մահացության դեպք չի գրանցվել:
Գեղարքունիքի մարզային փրկարարական վարչության հատուկ ջրափրկարարական ջոկատի հրամանատար Արմեն Ճզմաչյանը, անդրադառնալով վիճակագրությանը, նշում է՝ ուժեղացված ծառայության ընթացքում պարեկներն ու փրկարարները լճում օգնություն են ցուցաբերել քաղաքացիներին, արձագանքել լողամիջոցների խափանման դեպքերին, բացահայտել իրավախախտումներ։
«Ունենք ջրահեղձությունից փրկված 5 քաղաքացի, որոնք անցել են սահմանված լողանշանները և ինքնուրույն ափ վերադառնալու փորձը չի հաջողվել, կամ պարզապես ջրում ինքնազգացողությունն է վատացել: Նրանց անվտանգ դուրս ենք բերել ափ, որոշ դեպքերում նաև հանձնել շտապօգնության բուժաշխատողներին, և տուժածին տեղափոխել են հիվանդանոց»,- ներկայացնում է Արմեն Ճզմաչյանը:
Ուժեղացված ծառայության ընթացքում ջրային պարեկների և փրկարարների կողմից հասարակական կարգի պահպանման ու քաղաքացիների անվտանգության ապահովման առաքելությունն իրականացվեց բարձր պատասխանատվությամբ:
Սևանի ավազանում հանգստի կազմակերպումն ավելի անվտանգ դառնալու վերաբերյալ դրական արձագանքներ են եղել նաև հանգստացող քաղաքացիներից:
Ջրային պարեկային ծառայության կողմից բացահայտվել է հանցագործության 29 դեպք, այդ թվում՝ թմրանյութի, սառը զենքի, զենք-զինամթերքի հայտնաբերման, մարմնական վնասվածք պատճառելու, ապօրինի ձկնորսության և այլ դեպքեր։ Կազմվել է վարչական իրավախախտման վերաբերյալ 9988 արձանագրություն։
Ուժեղացված ծառայության ընթացքում փրկարարներն արձագանքել են 20 արտակարգ դեպքերի, այդ թվում՝ ջրային տրանսպորտի մասնակցությամբ պատահարների, նաև օգնություն է ցուցաբերվել լճում ափից բավական հեռավորության վրա գտնվող և լողալ չկարողացող քաղաքացիների: Իսկ Շողակաթ բնակավայրի՝ Սևանա լճի ափամերձ գոտում շուրջօրյա հերթապահությունն իրականացվել է ՓԾ փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի անձնակազմի ուժերով:
Ջրային պարեկների վաշտի երկրորդ դասակի հրամանատար Իշխան Հակոբյանի խոսքով՝ ջրային պարեկները հասարակական կարգի պահպանությունից, տարաբնույթ իրազեկումներից զատ հատուկ ուշադրություն են դարձրել ապօրինի ձկնորսության դեպքերին.«Ջրային պարեկային ծառայության մեկնարկից ի վեր առգրավվել են 1295,5 կգ տարբեր տեսակի ձկներ, ձկնորսական պարագաներ՝ հանդերձանք, ցանց, հատուկ պահպանման տարածք են տեղափոխվել վարչական խախտման գործիք լողամիջոցներ»:
Լողասեզոնի փակումը ազդարարվում է փրկարարների և ջրային պարեկների փոխլրացնող աշխատանքի դրական արդյունքներով. համատեղ միջոցառումները հաջողվել են: Փոխլրացնող աշխատանքի հաջողած փորձը լավ հենք է նաև հաջորդ տարի առավել կատարելագործված ծառայություն իրականացնելու համար։
