Եթե մեկ նախադասությամբ արձանագրենք՝ դա պաշտպանական, անվտանգային հարաբերություներում Ռուսաստանի կողմից իր պարտավորությունները չկատարելն է թե՛ երկկողմ, թե՛ ՀԱՊԿ-ի շրջանակներում: Հիմնական հարցը, որի մասին Հայաստանն ունեցել է և ունի հարցադրումներ, դա է: Այդ մասին ճեպազրույցի ժամանակ ասաց ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը՝ արձագանքելով հարցին, թե ինչ տարաձայնություններ կան Ռուսաստանի հետ, ինչպես նաև ՌԴ-ի այն դիտարկումներին, թե իբր հայկական կողմը չի կատարում նոյեմբերի 9-ի հայտարարության դրույթները:
«Երբ կողմերը խոսում են նոյեմբերի 9-ի փաստաթղթի մասին, պետք է ամբողջության մեջ դա դիտարկեն ու հասկանան՝ ով ինչ է արել ու ինչ չի արել: Չկա նոյեմբերի 9-ի հայտարարության մեջ մի կետ, որ Հայաստանը չի իրականացրել»,- ասաց նա:
