Ռուսաստանի նախագահ Վլադիմիր Պուտինը հեռախոսազրույց է ունեցել Հնդկաստանի վարչապետ Նարենդրա Մոդիի հետ։
Կրեմլից հայտնել են, որ Մոդին տեղեկացրել է Կիև կատարած իր վերջին այցի մասին, ընդգծել Ուկրաինայում իրավիճակի քաղաքական-դիվանագիտական կարգավորման գործում ներդրում ունենալու շահագրգռվածությունը:
«Իր հերթին Վլադիմիր Պուտինը սկզբունքային գնահատական է տվել Կիևի իշխանությունների և նրանց արևմտյան հովանավորների ապակառուցողական գծին՝ ուրվագծելով հակամարտության կարգավորման ուղիների վերաբերյալ ռուսական առանցքային մոտեցումները»,- ասված է Կրեմլի հաղորդագրության մեջ։
Քննարկվել են նաև Հնդկաստանի վարչապետի՝ հուլիսին Ռուսաստան կատարած պաշտոնական այցի ավարտին առևտրատնտեսական ոլորտում ձեռք բերված պայմանավորվածությունների գործնական իրականացմանը վերաբերող հարցեր:
Գոհունակություն է հայտնվել BRICS-ի շրջանակում երկու երկրների փոխգործակցության վերաբերյալ։ Մոդին հաստատել է 2024 թվականի հոկտեմբերին Կազանում նախատեսված՝ միավորման գագաթնաժողովին մասնակցելու պատրաստակամությունը։
