Փաստաթղթերի ստորագրումից հետո Ադրբեջանի նախագահ Ալիևը հայտարարել է, որ Ադրբեջանն ու Ռուսաստանը գործում են որպես դաշնակիցներ և բարեկամներ:
«Այսօր ընդունված փաստաթղթերը, ներառյալ, առաջին հերթին, նախագահների համատեղ հայտարարությունը, ևս մեկ անգամ հաստատում են մեր հարաբերությունների բարեկամական և դաշնակցային բնույթը: Դաշնակցային 2022 թվականի փետրվարին ստորագրված փոխգործակցության մասին հռչակագրի դրույթները հաջողությամբ իրականացվում են։ Մեր երկրները գործում են որպես դաշնակիցներ, բարեկամներ, մերձավոր գործընկերներ ու հարևաններ», - ընդգծել է Ալիևը։
Ադրբեջանի նախագահը նշել է, որ Ռուսաստանի նախագահի հետ մանրամասն քննարկել են «Հյուսիս-Հարավ» նախագծի իրականացումը, որը բացառիկ կարևոր նշանակություն ունի նաև միջպետական հարաբերությունների, ինչպես նաև տարածաշրջանային տրանսպորտային միջանցքների, տրանսպորտային ուղիների հետ կապված հարցերում:
«Ադրբեջանի տարածքում Հյուսիս-Հարավ միջանցքի և՛ երկաթուղային, և՛ ավտոմոբիլային հատվածները լիովին իրականացվել են և հաջողությամբ գործում են։ Այս պահին մենք ակտիվորեն զբաղվում ենք այդ միջանցքի երկաթուղային հատվածի արդիականացմամբ, որպեսզի բարձրացնենք դրա թողունակությունը»,- ասել է Ալիևը։
Ադրբեջանի նախագահը նշել է, որ ռուսաստանցի գործընկերոջ հետ քննարկել են նաև տարածաշրջանային անվտանգությանն առնչվող հարցեր։
«Անցած տարվա սեպտեմբերից հետո մարզում բոլորովին նոր իրավիճակ ստեղծվեց. Ադրբեջանը լիովին վերականգնել է իր ինքնիշխանությունն ու տարածքային ամբողջականությունը: Բնականաբար, նոր իրավիճակը նոր հնարավորություններ է ստեղծում Հարավային Կովկասում ամուր և երկարաժամկետ խաղաղության հաստատման համար։ Իսկ ամբողջ հարավկովկասյան տարածաշրջանի կայունությունն ու անվտանգությունը մեծապես կախված են Ռուսաստանի և Ադրբեջանի սերտ փոխգործակցությունից»,- ընդգծել է նա:
