Բելառուսի և Ուկրաինայի սահմանին իրավիճակը լիովին վերահսկվում է, սահմանապահները ծառայում են ուժեղացված ռեժիմով, երկուշաբթի հայտարարել է Բելառուսի պետական սահմանային կոմիտեի պաշտոնական ներկայացուցիչ Անտոն Բիչկովսկին։
Բելառուսի նախագահ Ալեքսանդր Լուկաշենկոն ավելի վաղ հայտնել էր, որ ուրբաթ երեկոյան, ենթադրաբար, ուկրաինական գրոհային անօդաչու սարքեր են խոցվել հանրապետության տարածքում, իսկ մյուս մասը ոչնչացրել են ռուս զինծառայողները Ռուսաստանի Դաշնության տարածքում։ Լուկաշենկոն հայտնել է, որ անօդաչու թռչող սարքի բեկորների որոնողական աշխատանքները շարունակվում են։ Երկրի ղեկավարը տեղի ունեցածը սադրանք է անվանել՝ նշելով, որ «ցանկացած նման գործողություն անպատասխան չի մնա»։
Բելառուսի պաշտպանության նախարար Վիկտոր Խրենինը հայտնել է, որ Լուկաշենկոն հրահանգել է ուժեղացնել զորքերի խմբավորումը Գոմելի և Մոզիրի մարտավարական ուղղություններում՝ հանրապետության հարավում, որտեղ այն սահմանակից է Ուկրաինային:
