ԱՄՆ իշխանությունը լրացուցիչ նավեր և ինքնաթիռներ է ուղարկում Մերձավոր Արևելք՝ անհրաժեշտության դեպքում պաշտպանելու տարածաշրջանում տեղակայված ամերիկյան ուժերը և Իսրայելը, ինչպես նաև ամրապնդում է հակահրթիռային պաշտպանութունը:
Պենտագոնի փոխխոսնակ Սաբրինա Սինգհի ձևակերպմամբ՝ ԱՄՆ պաշտպանության նախարարությունը քայլեր է ձեռնարկում՝ նվազեցնելու Իրանի, նրա գործընկերների և Իսլամական Հանրապետության վերահսկողության տակ գտնվող ուժերի կողմից տարածաշրջանում էսկալացիա հրահրելու հավանականությունը: Նա տեղեկացրել է, որ Վաշինգտոնը նման որոշում է կայացրել ԱՄՆ նախագահի և Իսրայելի վարչապետի՝ երեկ տեղի ունեցած հեռախոսազրույցից հետո:
Թեհրանում ՀԱՄԱՍ-ի քաղբյուրոյի ղեկավար Իսմայիլ Հանիեի և Բեյրությում «Հեզբոլլահի» բարձրաստիճան հրամանատարի սպանությունից հետո Իրանը, ՀԱՄԱՍ-ը և Լիբանանում գործող «Հեզբոլլահ» շարժումը խոստացել են անպատասխան չթողնել Իսրայելի գործողությունները:
Իսրայելական կողմը հայտարարել է՝ լայնամասշտաբ պատերազմ չեն ցանկանում, բայց պատրաստ են ցանկացած սցենարի:
