ԱՄՆ նախկին նախագահ, նախագահի թեկնածու Դոնալդ Թրամփը Ֆլորիդայում ընդունել է Իսրայելի վարչապետ Բենիամին Նեթանյահուին:
Reuters-ը գրում է՝ այս հանդիպումը վկայում է, որ Թրամփը և Նեթանյահուն փորձում են հարթել իրենց հարաբերություններում առկա լարվածությունը, որն առաջացել էր, երբ Նեթանյահուն շնորհավորել էր Ջո Բայդենին 2020 թվականի նախագահի ընտրությունում հաղթելու կապակցությամբ:
Թրամփը նաև վերջերս քննադատել է Նեթանյահուին՝ Գազայի հատվածում ռազմական գործողությունների ընթացքում անվտանգության ապահովման հարցերում ձախողումների համար:
Ֆլորիդայում հանդիպման ժամանակ Թրամփը հայտարարել է՝ ոչ մի նախագահ Իսրայելի համար այնքան բան չի արել, որքան ինքը:
Նեթանյահուն էլ հույս է հայտնել, որ առաջիկայում հնարավոր կլինի հրադադարի և ՀԱՄԱՍ-ի գերեվարած անձանց վերադարձնելու մասին գործարք կնքել:
Թրամփի հետ հանդիպելուց առաջ Նեթանյահուն Միացյալ Նահանգներում բանակցություններ է վարել նաև ԱՄՆ գործող նախագահ Ջո Բայդենի և փոխնախագահ, դեմոկրատների կողմից նախագահի հավանական թեկնածու Քամալա Հարիսի հետ:
