Ռուսաստանն իր բարեկամներին, դաշնակիցներին, գործընկերներին երբեք չի դրել երկընտրանքի առաջ՝ մեզ հետ կամ մեր դեմ՝ ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ անդրադառնալով Հայաստան-ԱՄՆ ռազմավարական երկխոսությանը։
«Մենք նման խնդիր չենք դրել. դա հակասում է մեր հիմնարար սկզբունքներին»,- ասել է ՌԴ ԱԳՆ խոսնակը, հավելել՝ դա Արևմուտքի գործելաոճն է, որն ամբողջությամբ արհամարհում է նրանց շահերը, մտահոգությունները, որոնց հետ ռազմավարական երկխոսություն է հաստատում։ Զախարովայի խոսքով՝ դրա դասական օրինակն Ուկրաինան է։
«Արդյոք հայ ժողովուրդը գիտակցո՞ւմ է, որ գործընկերությունը գործնականում չի նշանակում պաշտպանության, խնամատարության, օգնության ցուցաբերում, առավել ևս՝ հայտարարված ծավալի աջակցություն»,- հարցրել է Զախարովան։ Նրա խոսքով՝ ակնհայտ է, որ այդ մեխանիզմի իրական իմաստը տվյալ երկիրը ԱՄՆ-ի արտաքին կառավարման ներքո տեղափոխելն է։
ՌԴ ԱԳՆ խոսնակն անդրադարձել է նաև հայ-ամերիկյան փոխայցելություններին, նշել՝ վստահություն չկա, որ Հայաստանը կստանա խոստացված օգնությունը։ Զախարովայի խոսքով՝ ԱՄՆ-ն զիջումներ է պահանջում ոչ միայն տրամադրված, այլև արդեն խոստացված գումարի դիմաց։
