Ջրային պարեկային ծառայությունը, որը ստեղծվել է 2023 թ. դեկտեմբերի 7-ին, ամառային սեզոնով պայմանավորված՝ հուլիսի 1-ից անցել է ուժեղացված ծառայության։ Այդ մասին հայտնում են ՆԳՆ ոստիկանությունից:
Սևանա լճի առափնյա հատվածների ծառայությունն իրականացվում է պարեկային մեքենաների, լճի վրա նավերի ու սկուտերների միջոցով, ինչպես նաև հետիոտնային հատվածներում:
Ջրային պարեկ դառնալու համար ծառայողներն անցել են հատուկ դասընթացներ, հանձնել են մի շարք նորմատիվներ։
«Պարեկների ընտրությունը կատարվում է ըստ իրենց ցանկության, սակայն կան մի շարք պահանջներ, որոնց պետք է համապատասխանի ջրային պարեկը։ Առաջին պահանջը լողալու ունակության ստուգումն է, երկրորդը ֆիզիկական պատրաստվածությունն է. երկամսյա դասընթացներից հետո համալրվում է ջրային պարեկի շարքերը»,- ասում է Պարեկային ծառայության Գեղարքունիքի մարզի գումարտակի ջրային պարեկների վաշտի 2 րդ դասակի հրամանատար, ոստիկանության մայոր Իշխան Հակոբյանը:
Ջրային պարեկային ծառայությունը բաղկացած է չորս հենակետից, իսկ ջրային վաշտը համալրվել է ևս 29 ծառայողով։
Ջրային պարեկային ծառայությունը համագործակցում է ՆԳՆ Փրկարար ծառայության, «Սևան ազգային պարկ» ՊՈԱԿ-ի, ինչպես նաև «Ընդերքի տեսչական մարմնի» և համայնքային մի շարք այլ կառույցների հետ։
Փրկարար ծառայության հետ համատեղ աշխատանքն առավել արդյունավետ է դարձնում վերահսկողությունը։
«Ուժեղացված ռեժիմով ծառայությունը սկսվել է հուլիսի 1 ից, այսինքն՝ բացի կենտրոնական կայանից, որտեղ ծառայությունն իրականացվում էր ողջ սեզոնի ընթացքում, հիմա արդեն 24-ժամյա ծառայություն իրականացվելու է նաև հանրային երեք լողափերում, որտեղ տեղակայված են մեր հենակետերն իրենց գույք-սարքավորումներով, մոտորանավակներով։ Ջրափրկարարները տեղում իրականացնելու են շրջայցեր մոտորանավակների միջոցով, որի ժամանակ բարձրախոսներով հաղորդվելու է անվտանգության կանոնների պահպանման մասին, հետևելու են, որպեսզի լողալով չանցնեն խորքերը, և որպեսզի ջրային փոխադրամիջոցները չխանգարեն լողացողներին իրենց սահմանված տարածքում»,-ասում է Փրկարար ծառայության Գեղարքունիքի մարզի փրկարարական վարչության հատուկ ջրափրկարարական ջոկատի հրամանատար, փ/ծ փոխգնդապետ Արմեն Ճզմաչյանը:
Ջրային պարեկային ծառայությունը լավ արդյունքներ է գրանցել նաև ապօրինի ձկնորսության դեպքերի բացահայտման, իրավախախտումների հայտնաբերման ուղղությամբ։
Ծառայությունը համալրված է ժամանակակից տեխնիկայով՝ նավեր, սկուտերներ, հատուկ հանդերձանք և համապատասխան պատրաստվածություն:
Ջրային պարեկները վստահեցնում են՝ իրավախախտների նկատմամբ խիստ են լինելու, բարձր պատասխանատվությամբ պահպանելու են հասարակական կարգն ու հանգստացողների անվտանգությունը։
Հաճելի և, ամենակարևորը, ապահով հանգիստ ունենալու համար ՆԳ նախարարությունը հորդորում է պահպանել հասարակական կարգն և լողամիջոցների շահագործման կանոնները։
