ՀՀ ԱԺ պատվիրակությունը մասնակցում է Ստրասբուրգում ընթացող ԵԽԽՎ նստաշրջանի աշխատանքներին:
Իր ելույթում ՀՀ ԱԺ պատվիրակության անդամ Արուսյակ Ջուլհակյանն ասել է.
«Հարգարժա՛ն գործընկերներ,
Մեծ պատիվ է այսօր պատմել ձեզ 2018 թվականի հեղափոխությունից ի վեր Հայաստանում իրականացված նշանակալի ժողովրդավարական բարեփոխումների մասին: Թավշյա հեղափոխությունը բեկումնային պահ էր մեր ժողովրդի պատմության մեջ, որ սկիզբ դրեց հույսի, փոփոխությունների և ժողովրդավարության վերականգնման դարաշրջանին:
Թավշյա հեղափոխությունը մի պահ էր, երբ Հայաստանի ժողովուրդը համախմբվեց` պահանջելով վերջ տալ կոռուպցիային և ավտորիտարիզմին: Այս հեղափոխությունը միայն առաջնորդներ փոխելու մասին չէր. այն Հայաստանի քաղաքական լանդշաֆտը հիմնովին վերափոխելու մասին էր:
Հեղափոխությունից ի վեր Հայաստանը բռնել է համապարփակ ժողովրդավարական բարեփոխումների ուղին, որն ուղղված է ժողովրդավարական ինստիտուտների ամրապնդմանը, թափանցիկության բարձրացմանը և օրենքի գերակայության խթանմանը: Հետհեղափոխական ամենակարևոր ձեռքբերումներից մեկն ընտրական համակարգի հիմնանորոգումն է: Հայաստանի կառավարության կողմից ջանքեր են գործադրվել ապահովելու, որ ընտրություններն անցնեն ազատ, արդար և թափանցիկ: Ընտրական օրենսգիրքը, ինչպես նաև «Կուսակցությունների մասին» օրենքն էական փոփոխությունների են ենթարկվել: Վենետիկի հանձնաժողովի բազմաթիվ, ինչպես նաև ԵԱՀԿ/ԺՀՄԻԳ-ի առաջարկություններին համապատասխան:
Դատական իշխանության անկախության ամրապնդումը եղել է Հայաստանի ժողովրդավարական բարեփոխումների հիմնաքարը: Քայլեր, ինչպիսիք են դատավորների, դատախազների, քննիչների թեկնածուների բարեվարքության ստուգումը, ձեռնարկվել են` երաշխավորելու, որ այդ պաշտոններում ընտրության գործընթացն արժանիքահենք է և զերծ քաղաքական ազդեցությունից:
Հատուկ ուշադրություն է դարձվել կոռուպցիայի դեմ պայքարին: Ոստիկանության ոլորտում իրականացված հավակնոտ բարեփոխումները, հակակոռուպցիոն մարմինների ստեղծումը և կոռուպցիոն դրսևորումների դեմ խիստ միջոցառումների նախաձեռնումը նպաստել են կոռուպցիայի կանխարգելմանը և հակազդմանը` ստեղծելով ավելի թափանցիկ և հաշվետու դատական ու իրավապահ մարմիններ:
Զգալի առաջընթաց է գրանցվել լրատվամիջոցների ազատության ապահովման ուղղությամբ: Աշխատանքներ են տարվել անկախ լրագրությունը խթանելու ուղղությամբ: Արդյունքում Հայաստանը 180 երկրների շարքում 43-րդն է ԶԼՄ-ների ազատության ինդեքսում 2024 թվականի դրությամբ և ամեն տարի անընդմեջ բարելավել է իր վարկանիշը:
Հարգելի՛ գործընկերներ, պատերազմը ժողովրդավարության ամենամեծ թշնամին է: Այդուհանդերձ, այս մարտահրավերը չի խանգարել Հայաստանի կառավարությանը՝ շարունակելու ժողովրդավարական բարեփոխումներն անվտանգության հետ կապված խնդիրներին զուգահեռ: Լեռնային Ղարաբաղում 44-օրյա պատերազմից հետո Հայաստանի ինքնիշխան տարածքի վրա հետագա հարձակումներից հետո հայ հասարակության շրջանում քննարկվում էր, որ ժողովրդավարությունն ու անվտանգությունը բացառում են միմյանց, և հնարավոր չէ լինել ուժեղ երկիր` լինելով ժողովրդավար: Չնայած անվտանգության հետ կապված բոլոր դժվարություններին` հայ ժողովրդի պատասխանն այս բանավեճին հստակ էր: Ժողովրդավարությունն ու անվտանգությունը չեն հակասում, ավելի շուտ լրացնում են միմյանց: Ժողովրդավարությունը Հայաստանի ժողովրդի գիտակցված ընտրությունն է, և այն ամուր կանգնած է Հայաստանի ժողովրդավարության պաշտպանության խրամատում:
Հարգելի՛ գործընկերներ, չնայած զգալի առաջընթաց է գրանցվել, սակայն ժողովրդավարական բարեփոխումների ճանապարհը շարունակվում է: Հիմքերը դրված են, բայց մեզնից է կախված, թե ինչ կկառուցենք այդ հիմքերի վրա: Այս բարեփոխումների հաջողությունը կախված է Հայաստանի կառավարության քաղաքական կամքից: Մենք պետք է հավատարիմ մնանք ժողովրդավարության սկզբունքներին` ապահովելով, որ մեր ինստիտուտները լինեն դիմակայուն և արձագանքող բոլոր քաղաքացիների կարիքներին:
Գործընկերնե՛ր, 2018 թվականի հեղափոխությունից ի վեր Հայաստանում իրականացված ժողովրդավարական բարեփոխումները մեր ժողովրդին կանգնեցրել են ավելի լուսավոր, ավելի ժողովրդավարական ապագայի ուղու վրա: Եվ Հայաստանի կառավարությունն ամեն ինչ կանի մեր ժողովրդավարական արժեքները պաշտպանելու և այնպիսի հասարակություն կառուցելու համար, որտեղ գերակայում են ազատությունը, արդարությունը և հավասարությունը:
Շնորհակալություն»:
