ՀՀ արտգործնախարար Արարատ Միրզոյանն այսօր ՀՀ ԱԺ մշտական հանձնաժողովների համատեղ նիստում անդրադարձավ «Հայաստան» խմբակցության քարտուղար Արծվիկ Մինասյանի հարցին, թե ի՞նչ է անում իշխանությունը ԼՂ ժողովրդի վերադարձի իրավունքն ապահովելու համար:
Մինասյանի խոսքով՝ իրենք դա դիտարկում են միջազգային իրավունքին համապատասխան՝ ոչ թե ռազմական գործողությունները առաջ մղելով, այլ միջազգային լայն կոնսոլիդացիայով:
«Վերադարձի իրավունքը պաշտպանվում է գրեթե բոլոր առաջադեմ երկրների կողմից»,- նշեց պատգամավորը՝ ընդգծելով, թե միջազգային իրավունքների և երաշխիքների ներքո ԼՂ հայությունը վերադառնալու, իր հայրենիքում ապրելու իրավունք պետք է ունենա այն երաշխիքներով, որ որոշակի ինքնավարության աստիճան պետք է լինի:
Միրզոյանն արձագանքեց ինքնավարության վերաբերյալ Մինասյանի խոսքերին, նշեց՝ ինչ ուզում էր, լսեց այդ մի դրվագով:
«Ասում եք ԼՂ-ի ինքնավարություն: Հրաշալի է, բացի նրանից, որ դուք դա հիմա ասում եք, այն պահին և այն պայմաններում, երբ ԼՂ-ում այլևս հայ չկա: Երբ ԼՂ-ում հայեր կային, և մենք առաջարկում էինք իջեցնել նշաձողը անկախությունից և խոսել այդ տեսակ հարցերի մասին, մեզ ասում էին դավաճան»,- ասաց ԱԳ նախարարը:
Միրզոյանի խոսքով՝ երբ մենք ամեն անգամ վերցնում ենք նույն բառամթերքը, նույն գործելաոճը ու բախվում ենք պատին, կարո՞ղ է մի բան սխալ ենք անում:
«Դուք էլ եք ուշ հասկանում, մեզ եք մեղադրում ուշ հասկանալու մեջ: Բա դուք ինչի՞ չէիք հասկանում, որ կարելի է ինքնավարություն ասել»,- նշեց նախարարը:
