Թուրքմեն բանաստեղծ Մախթումկուլի Ֆրագիի ծննդյան 300-ամյակին նվիրված մշակույթի նախարարների միջազգային խորհրդաժողովի շրջանակում ՀՀ կրթության, գիտության, մշակույթի և սպորտի նախարար Ժաննա Անդրեասյանը հանդես է եկել զեկույցով, ինչպես նաև վարել է խորհրդաժողովի հերթական սեկցիան՝ «Մախթումկուլի Ֆրագի և համաշխարհային մշակույթ» թեմայով:
ԿԳՄՍ նախարարը, ողջունելով ներկաներին և կարևորելով թուրքմենական նոր գրականության հիմնադիր Մախթումկուլի Ֆրագիի գրական ժառանգությունը, ընդգծել է՝ որպես մշակութային տեղեկատվության անփոխարինելի աղբյուր՝ գրականությունն ընդգրկում է տարբեր հասարակությունների, ավանդույթների և արժեքների համադրությունը:
«Գրականությունն արժեքավոր հնարավորություններ է տալիս ուսումնասիրելու ազգերի ավանդույթները, հավատալիքներն ու փորձառությունները` դրանք փոխանցելով սերունդներին: Ֆրագիի պոեզիան թուրքմեն ժողովրդի մարտահրավերների, հավակնոտ երազանքների և հաղթանակների մանիֆեստն է։ Մենք՝ հայերս, ծանոթ ենք նրա արժեքավոր ստեղծագործություններին 1950-ական թվականներից և կարողացել ենք բազմաթիվ զուգահեռներ անցկացնել նույն շրջանի հայ գրականության ժառանգության հետ»,- նշել է Ժաննա Անդրեասյանը՝ այս համատեքստում ընդգծելով Սայաթ-Նովայի հարուստ ու գեղեցիկ գրական ժառանգությունը։
«Այդ ժառանգությունը մեզ՝ հայերիս համար երաժշտական-բանաստեղծական ուղեցույց է այնպես, ինչպես Ֆրագիի ստեղծագործությունները թուրքմեն ժողովրդի համար։ Մախթումկուլիի ժամանակակից, նշանավոր հայ գրող Սայաթ-Նովան, որը ստեղծագործում էր մի շարք լեզուներով, նույնպես մեծ հարգանք ու սեր է վայելել ոչ միայն իր հայրենիքում, այլև ամբողջ աշխարհում»,-շեշտել է ԿԳՄՍ նախարարը։
Նրա խոսքով` գրական լեզվի վերագնահատումը, փոխակերպումը և զարգացումը Ֆրագիի նշանակալի ներդրումն է իր ժողովրդի մշակույթում, որով նա թուրքմենական բանաստեղծական լեզուն ավելի հասկանալի է դարձրել ընթերցողին։ ԿԳՄՍ նախարարը նաև ընդգծել է՝ նմանօրինակ խորհրդաժողովները կարող են դիտվել որպես գրականությունը համաշխարհային ժառանգության մաս դարձնելու առաքելության ըմբռնման:
Ժաննա Անդրեասյանը շնորհակալություն է հայտնել բարեկամ Թուրքմենստանի կառավարությանը՝ միջոցառման հրավերի, ինչպես նաև արդյունավետ քննարկումների համար։
Հիշեցնենք՝ խորհրդաժողովին մասնակցում են տարբեր պետությունների բարձրաստիճան պատվիրակություններ, միջազգային կազմակերպությունների ղեկավարներ, գիտական և ստեղծագործական հանրույթի ներկայացուցիչներ:
