Աշխատանքի և սոցիալական հարցերի նախարար Նարեկ Մկրտչյանն ընդունել է Հայաստանում Ֆրանսիայի արտակարգ և լիազոր դեսպան Օլիվիե Դըկոտինյիին և Միգրացիայի և ինտեգրման ֆրանսիական գրասենյակի տնօրեն Մարիոն Գրեգուարիին: Այդ մասին հայտնում են ՀՀ աշխատանքի և սոցիալական հարցերի նախարարությունից:
Կարևորելով երկու երկրների բարեկամական հարաբերությունների զարգացմանն ու համագործակցության ընդլայնմանն ուղղված աշխատանքների շարունակականությունը՝ կողմերը քննարկել են սոցիալական պաշտպանության ոլորտին առնչվող մի շարք հարցեր, այդ թվում՝ նախատեսվող համատեղ ստորագրման հուշագրի մանրամասները, ԼՂ-ից բռնի տեղահանված անձանց աջակցությանն ուղղված ծրագրերի ընթացքն ու արդյունքները:
«Հայաստանը բարձր է գնահատում Ֆրանսիայի հետ բարեկամական հարաբերությունները և մենք միշտ պատրաստ ենք քննարկել մեր երկու երկրների կառավարությունների միջև ոլորտային հարաբերությունների առավել ամրապնդման հնարավորությունները, մասնավորապես՝ սոցիալական պաշտպանության և աշխատանքի ոլորտներում։ Մենք արդեն իսկ ունենք բազմոլորտ համագործակցության և երկխոսությունների հաջողված փորձ, ուստի ուրախ կլինենք կնքվող հուշագրի շրջանակում առավել հստակեցնել նաև մեր անելիքները՝ խթանելով Հայաստան վերադարձող միգրանտների վերաինտեգրումը, զբաղվածության և վերապատրաստումների ապահովումը»,- նշել է նախարար Մկրտչյանը:
Դեսպան Դըկոտինյին ևս կարևորել է փաստաթղթի ստորագրումը և հայտնել իր պատրաստակամությունը ներդնելու ջանքեր՝ արդյունավետ համագործակցության շարունակականությունն ապահովելու համար:
«Մենք պատկերացնում ենք այն մարտահրավերները, որոնց առաջ կանգնած է Ձեր ղեկավարած նախարարությունը, և գնահատում ու տպավորիչ ենք համարում այն հսկայական ջանքերը, որ ներդրվել են ՀՀ կառավարության կողմից ԼՂ-ից տեղահանված անձանց ընդունելու, տեղավորելու և աջակցելու համար։ Մենք պատրաստ ենք ամեն կերպ շարունակելու օգնել ոչ միայն այս հարցում, այլև հուշագրով նախատեսվող քայլերի իրականացման գործում»,- ընդգծել է Օլիվիե Դըկոտինյին:
Հանդիպման շրջանակում գործընկերները քննարկել են փաստաթղթի ստորագրմանն առնչվող այլ մանրամասներ և պայմանավորվածություն ձեռք բերել դրանց իրականացումը կարճ ժամկետներում տեղափոխել գործնական փուլ:
