ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն ապրիլի 30-ին ընդունել է Ֆրանսիայի Հանրապետության Սենատի արտաքին հարաբերությունների, պաշտպանության և զինված ուժերի հանձնաժողովի, ինչպես նաև Եվրոպական հարցերի հանձնաժողովի անդամ Ռոնան Լը Գյոնին:
Հանդիպմանը մասնակցել է նաև Հայաստանում Ֆրանսիայի արտակարգ և լիազոր դեսպան Օլիվիե Դըկոտինյին:
Ողջունելով հյուրերին՝ Անդրանիկ Քոչարյանը բարձր է գնահատել Հայաստանի և Ֆրանսիայի խորհրդարանականների միջև ձևավորված համագործակցությունը՝ նշելով, որ անվտանգային բազմաթիվ խնդիրներ լուծվել են Ֆրանսիայի ցուցաբերած աջակցության շնորհիվ: Հանձնաժողովի նախագահն ընդգծել է Ֆրանսիայի խորհրդարանական պատվիրակությունների հետ միջազգային տարբեր հարթակներում առկա բարձր մակարդակի համագործակցությունը:
Շնորհակալություն հայտնելով հանդիպման համար՝ Ֆրանսիայի Սենատի արտաքին հարաբերությունների, պաշտպանության և զինված ուժերի հանձնաժողովի անդամ Ռոնան Լը Գյոնը հայտնել է, որ առաքելության շրջանակում մայիսի 7-ին ներկայացնելու է հատուկ հաշվետվություն-զեկույց, ըստ որի՝ Եվրամիությունն ընդունելու է հատուկ բանաձև: «Մեր նպատակն է, որպեսզի մենք հեշտացնենք Եվրոպական խաղաղության հիմնադրամի գործունեությունը: Եվ առաջին անգամ Եվրամիության պատմության մեջ նրանք աջակցություն են ցուցաբերելու Հայաստանին»,- նշել է նա:
Այս համատեքստում քննարկվել են երկուստեք հետաքրքրություն ներկայացնող մի շարք հարցեր: Անդրանիկ Քոչարյանն անդրադարձել է տարածաշրջանային խնդիրներին, Հայաստանի՝ տարածաշրջանում երկարատև խաղաղության հասնելու ջանքերին, երկրի հյուսիսում իրականացվող սահմանազատման գործընթացին, պաշտպանական ոլորտում Հայաստանի և Ֆրանսիայի համագործակցությանն ու նախատեսված ծրագրերին:
«44-օրյա պատերազմից հետո Հայաստանը վերցրել է մի ուղեգիծ, որը միտված է տարածաշրջանում խաղաղության հասնելուն: Պատերազմից հետո նման խնդիրն իրականություն դարձնելը բարդ ընթացակարգով անցավ, և այս պահին Հայաստանը ձեռնամուխ է եղել հյուսիսային հատվածում սահմանազատման և սահմանագծման խնդիրների լուծմանը՝ հաշվի առնելով, որ հսկայական դիմադրություն կար հակառակորդի կողմից այդ խնդիրներին վերաբերող հարցերին առնչվելու համար»,- նշել է Անդրանիկ Քոչարյանը:
Նա կարևորել է պաշտպանական ոլորտում Ֆրանսիայի և այլ երկրների հետ համագործակցությունն ու նոր որակի բանակի առկայությունը մեր երկրում: «Տարածքային ամբողջականությունը պաշտպանելու համար մեզ պետք է նոր որակի բանակ, իսկ դա միտված է խաղաղության ապահովմանը»,- մասնավորապես ասել է Պաշտպանության և անվտանգության հարցերի մշտական հանձնաժողովի նախագահը:
