Խորհրդարանը քննարկում է Կառավարության ներկայացրած «Դատական ակտերի հարկադիր կատարման մասին» օրենքում փոփոխություններ և լրացումներ կատարելու մասին օրենքի նախագիծը առաջին ընթերցմամբ ընդունելու հարցը:
Նախագծի ընդունումը պայմանավորված է կատարողական վարույթի շրջանակում ֆիզիկական անձի, պարտապանի աշխատավարձի և այլ տեսակի եկամուտների վրա բռնագանձում տարածելու վերաբերյալ դրույթները հստակեցնելուն, պարտապան-ֆիզիկական անձանց լրացուցիչ սոցիալական երաշխիքներ նախատեսելու, ինչպես նաև կատարողական գործողությունների իրականացման արդյունավետությունն ապահովելու անհրաժեշտությամբ:
Նախագծով առաջարկվում է 200 հազար դրամ և ավելի բռնագանձնման պահանջով վարույթներով նախատեսել հնարավորություն՝ պահանջատիրոջ համաձայնության դեպքում, անկախ պարտապանին սեփականության իրավունքով պատկանող գույքի առկայության, բռնագանձում տարածել պարտապանի աշխատավարձի վրա, եթե չկան բռնագանձման ենթակա այլ դրամական միջոցներ, և եթե պարտապանի աշխատավարձի չափը բավարար է դրանց վրա բռնագանձում տարածելով պահանջն առավելագույնը 6 ամսվա ընթացքում մարելու համար:
«Չանտեսելով կատարման ենթակա ակտի հարկադիր կատարման կարևորությունը՝ նշված կարգավորումը լրացուցիչ երաշխիք է ստեղծում պարտապանի սոցիալական դրության պաշտպանության համար, քանի որ օրենսդրական հիմք է ստեղծվում եկամուտների վրա բռնագանձում տարածելով՝ պարտապանի գույքի հարկադիր իրացման գործողությունները չկատարելու համար:
Հաջորդիվ առաջարկվում է սահմանել, որ պարտապանի աշխատավարձի վրա բռնագանձում տարածելուց հետո պարտապանին հասանելիք մասը չպետք է պակաս լինի օրենքով սահմանված նվազագույն աշխատավարձի չափից, բացառությամբ ալիմենտի, առողջությանը, կերակրողի մահվան դեպքում պատճառված վնասը, ինչպես նաև հանցագործության դեպքում պատճառված վնասը հատուցելու պարտավորությունների կատարման վարույթների, իսկ պարտապանի կենսաթոշակի վրա բռնագանձում տարածելուց հետո՝ Կառավարության կողմից սահմանված սոցիալական նպաստի չափից: Այս կարգավորումը ևս լրացուցիչ երաշխիք է ստեղծում պարտապանի սոցիալական երաշխիքների ապահովման բնագավառում:
Առաջարկվում է սահմանել, որ բռնագանձում չի կարող տարածվել այն գույքի վրա, որը Կառավարության որոշմամբ տրամադրվում է որպես աջակցություն կամ փոխհատուցում, եթե կան Կառավարության նույն որոշմամբ սահմանված է, որ տվյալ գույքը բռնագանձնման ենթակա չէ»,- ելույթում հայտարարեց հիմնական զեկուցող, արդարադատության նախարարի տեղակալ Լևոն Բալյանը:
Հարակից զեկուցող, պետական-իրավական հանձնաժողովի նախագահ Վլադիմիր Վարդանյանի խոսքով՝ նախագիծը կոչված է հստակ բալանսավորում մտցնելու պարտապանի և պարտատիրոջ հարաբերությունների միջև՝ կապված Հարկադիր կատարման ծառայության գործողությունների հետ:
Նախագիծը քննարկվել է պետաիրավական հանձնաժողովում, ստացել դրական եզրակացություն:
