Ադրբեջանում լրագրողների ու քաղաքացիական հասարակության ներկայացուցիչների նկատմամբ բռնաճնշումների ուժգնացումը խոր մտահոգություն է առաջացնում: Այդ մասին հայտարարել է Եվրոպայի խորհրդի Մարդու իրավունքների հանձնակատար Դունյա Միյատովիչը՝ վկայակոչելով ձերբակալությունները, կալանավորումները և դատական գործընթացները, որոնք ուղղված են երկրում խոսքի ազատության սահմանափակմանը:
«Վերջին ամիսներին Ադրբեջանի իշխանություններն ուժեղացրել են բռնաճնշումները անկախ ԶԼՄ-ների, քաղաքացիական հասարակության և ակտիվիստների նկատմամբ, որոնք օրինական կերպով իրականացրել են իրենց աշխատանքը կամ կառավարության նկատմամբ արտահայտել այլ կարծիք կամ քննադատական հայացքներ»,- նշել է պաշտոնյան։
Նա Ադրբեջանի իշխանություններին կոչ է արել վճռական քայլեր ձեռնարկել մարդու իրավունքների ոլորտում ստանձնած պարտավորությունների լիարժեք կատարումն ապահովելու համար:
«Դրա համար անհրաժեշտ է ազատ արձակել բոլոր նրանց, ովքեր ազատազրկվել են իրենց օրինական գործունեության կամ այլախոհ կամ քննադատական կարծիքներ արտահայտելու համար: Պետք է նաև բարենպաստ պայմաններ ստեղծել լրագրողների, քաղաքացիական հասարակության և իրավապաշտպանների գործունեության համար, այդ թվում՝ նրանց կողմից արտահայտվելու և խաղաղ հավաքների ազատության իրավունքի իրականացման համար»,- նշել է Միյատովիչը:
