Մարդու իրավունքների պաշտպանի գրասենյակից հայտնում են, որ Անահիտ Մանասյանը մարտի 21-ին՝ Դաունի համախտանիշի համաշխարհային օրը, ներկա է եղել «Արևային զանգակների» համերգին:
Միջոցառումն անցկացվել է Արարատյան Հայրապետական թեմի Զորավոր Սուրբ Աստվածածին եկեղեցում։ «Արև-երեխաներ» երեխաների առողջության և զարգացման կենտրոն հասարակական կազմակերպության անդամ հանդիսացող և Դաունի համախտանիշ ունեցող երեխաները զանգակներով ներկայացրել են երաժշտական տարբեր գործեր։
Միջոցառման ընթացքում Պաշտպանն ու «արևները» միմյանց հարցեր են ուղղել, Անահիտ Մանասյանը ծանոթացել է նրանց նախասիրություններին, լսել առօրյայի հետ կապված տարբեր պատմություններ։
«Պետք է կարողանանք սիրել ու մեր հոգում առկա սերը միմյանց փոխանցել։ Ավելին, կարևոր է, որպեսզի միմյանց սիրենք` յուրաքանչյուրիս առանձնահատկությունները նկատի ունենալով։ Այդ առանձնահատկություններն են, որ մեզանից յուրաքանչյուրին մեր անհատականության մեջ կատարյալ են դարձնում»,- նշել է Պաշտպանը:
Անահիտ Մանասյանը չափազանց կարևորել է յուրաքանչյուրի հավասար հիմունքներով հասարակական կյանքում մասնակցությունն ու արդյունավետ սոցիալական ներառումը: Այս համատեքստում նա ընդգծել է, որ Պետությունը պետք է գործուն միջոցներ ձեռնարկի՝ երաշխավորելու Դաունի համախտանիշով մարդկանց անկախ ապրելու և համայնքում ներառվելու իրավունքի անխոչընդոտ իրացումը:
Անահիտ Մանասյանը «Արև-երեխաներին» փոխանցել է հուշանվերներ: Պաշտպանը վստահեցրել է, որ իր հնարավորության սահմաններում մշտապես կլինի նրանց կողքին:
«Արև-երեխաների» այս տարվա կարգախոսն էր «Լինենք միասին»։
Հաղորդագրությունում նշված է՝ «Արև-երեխաներ» երեխաների առողջության և զարգացման կենտրոն հասարակական կազմակերպությունը ներառված է Մարդու իրավունքների պաշտպանին առընթեր՝ հաշմանդամություն ունեցող անձանց իրավունքների պաշտպանության հարցերով հասարակական խորհրդի կազմում:
