Մոսկվայում ժամանակով կեսգիշերն անց Պուտինը ժամանել է իր նախընտրական շտաբ և մեկ ժամ տևած մամուլի ասուլիս տվել։ Դա վերաբերել է ոչ միայն ընտրությունում իր հաղթանակին, այլև այլ թեմաների։ Պուտինը խոսել է ուկրաինական ճգնաժամի, ոչ համակարգային ընդդիմության մասին և նույնիսկ առաջին անգամ հիշատակել է քաղաքական գործիչ Ալեքսեյ Նավալնու անունը: Պուտինն ասել է, որ, ինքը Նավալնու մահից առաջ համաձայնել էր նրան Արևմուտքի հետ փոխանակելու գաղափարին:
Ռուսաստանի ղեկավարը մեկնաբանել է նաև «Կեսօր՝ ընդդեմ Պուտինի» քարոզարշավը։ Նա գովել է ընդդիմությանը՝ ռուսներին ընտրատեղամասեր հրավիրելու համար (նույնիսկ դեմ քվեարկելու դեպքում), միաժամանակ նշել, որ իր դեմ արտահայտվելը «ոչ մի ազդեցություն չի ունեցել»: Պուտինը խոսել է նաև իր մրցակիցների՝ համակարգային ընդդիմության թեկնածուների մասին, որոնք միասին ստացել են ձայների 13%-ից պակաս։
«Այսօրվա պայմաններում նրանց ավանդական ընտրազանգվածի զգալի մասը, կարծում եմ, այնուամենայնիվ նախապատվությունը տվել է պետության գործող ղեկավարին՝ նկատի ունենալով այն բարդ իրավիճակը, որում մենք բոլորս գտնվում ենք»,- մեկնաբանել է ՌԴ նախագահը:
Խոսելով նախագահի ընտրության մասին՝ Պուտինը բարձր է գնահատել հեռավար էլեկտրոնային քվեարկությունը՝ «թափանցիկության և օբյեկտիվության» համար: Այդ ձևով քվեարկածների ճնշող մեծամասնությունն աջակցել է Պուտինին:
Ռուսաստանի նախագահը կոշտ է արտահայտվել քվեաթերթիկները փչացնողների մասին՝ ասելով, որ նրանք «վիրավորել» են նրանց, ովքեր եկել էին «իրենց քաղաքացիական պարտքը կատարելու»։ Պուտինը խոսել է նաև ՌԴ վերահսկողության տակ անցած տարածքներում իր օգտին քվեարկելու մասին։ «Ռուսաստանն ամեն ինչ ճիշտ է անում»,- ասել է նա։
Որոշ դիտորդներ քվեարկության բոլոր երեք օրերին հաղորդել են խախտումների մասին, որոնք առնչվել են լցոնումների մասին հաղորդումներին, քվեարկության գաղտնիությանը:
