ԵՄ, ԵԱՏՄ. դրանք էլ Սահմանադրությանը հավասար թեմաներ են, որովհետև իշխանությունը կարող է պատկերացում ունենալ այս կամ այն մասին, բայց որոշում կայացնողը ժողովուրդն է. այդ հարցերը ևս կարող են լուծվել միայն հանրաքվեի միջոցով: Ուրիշ տարբերակ չկա: Այդ մասին ասաց ՀՀ վարչապետ Նիկոլ Փաշինյանը՝ արձագանքելով հարցին, թե Հայաստանում ակտիվորեն քննարկվում է ԵՄ-ին անդամակցելու գաղափարը:
«Այլ բան, որ եթե քաղաքական իշխանությունը քննարկի, որոշում կայացնի և առաջնորդություն ստանձնի, տեսական տարբերակներից մեկն այն է, որ կարող է նման որոշում կայացնել, և նման առաջարկ անել հանրությանը, բայց որոշումը պետք է կայացնի ժողովուրդը, և մենք այս իրադրության մեջ քննարկում ենք ամենատարբեր սցենարներ: Այդ սցենարների մեջ երբ պատրաստի առաջարկ ունենանք, հանրությանն այդ առաջարկով հանդես կգանք, և, ընդ որում, այդ հարցի պատասխանը կախված է նաև մի շարք այլ հարցերի պատասխանից, որովհետև այդ հարցերը և այդ թեմաները վակուումի մեջ չեն և փոխկապակցվածություններ ունեն ամենատարբեր հարցերի հետ: ՀՀ-Իրան հարաբերությունները, որը մեզ համար շատ կարևոր է և ունի ռազմավարական նշանակություն, Հայաստան-Վրաստան հարաբերությունները, Հայաստան-Ռուսաստան հարաբերությունները, Հայաստան-Ադրբեջան, Հայաստան-Թուրքիա հարաբերությունները և այդպես շարունակ»,- նշեց նա:
Վարչապետը հիշեցրեց նաև իր այն հայտարարությունը, որ Հայաստանը պատրաստ է ԵՄ-ին լինել այնքան մոտ, որքան ԵՄ-ն հնարավոր կհամարի:
«Հիմա մենք պետք է հասկանանք, թե ԵՄ-ն ինչքան հնարավոր կհամարի: Դրանից հետո անենք հետևություններ: Բայց նաև կարևոր է, թե ՀՀ ժողովուրդը որքան հնարավոր կհամարի: Բայց այս փուլում մենք գործընթացը տեսնում ենք այսպես՝ ԵՄ-ի հետ մեր հարաբերությունները շատ ակտիվ են: Եվ հիմա մենք չենք ասում, ԵՄ-ն է ասում, որ Հայաստանի և ԵՄ-ի հարաբերությունները երբեք այսքան խոր և ամուր չեն եղել: Եվ ես հույս ունեմ, որ առաջիկայում կունենանք մի քանի որոշումներ, որոնք կլինեն այդ ուժեղ հարաբերությունների արտահայտությունը»,- ասաց Փաշինյանը:
«Այնպես չէ, որ մինչև հիմա այդ արտահայտությունները չեն եղել: Ուղղակի կարծում եմ, որ հարաբերությունները զարգանում են, այն նոր դրսևորումներ ու արտահայտություններ պետք է ունենա: Օրինակ՝ այդ արտահայտություններից մեկը կարող է լինել վիզաների ազատականացման բանակցությունների մեկնարկը ՀՀ-ի և ԵՄ-ի միջև: Հաջորդ թեմաներից մեկը կարող է լինել առևտրային արտոնյալ պայմանների տրամադրումը ՀՀ-ում արտադրված ապրանքներին և ՀՀ-ի տնտեսական կապերի խորացման ուղղությամբ:
Հաջորդ արտահայտությունը կարող է լինել անվտանգության ոլորտում մեր համագործակցության և հարաբերությունների խորացումը, նաև ՀՀ-ում ԵՄ քաղաքացիական դիտորդական առաքելության կարողությունների մեծացումը, ԵՄ դիտորդների մանդատը ևս 2 տարով երկարաձգելու մասին որոշումը և այսպես շարունակ: Այս պահին գործող մանդատը 2 տարի է»,- ասաց նա՝ նշելով, որ Հայաստանն ու ԵՄ-ն ունեն շատ լայն օրակարգ: «Մենք պատրաստ ենք այդ օրակարգն ընդլայնել ու խորացնել»,- ասաց Նիկոլ Փաշինյանը:
