ՀՀ-ին անհրաժեշտ է նոր Սահմանադրություն: Այդ մասին ասուլիսի ժամանակ ասաց ՀՀ վարչապետ Նիկոլ Փաշինյանը՝ արձագանքելով սահմանադրական բարեփոխումների վերաբերյալ հարցին:
«Չնայած էլի պետք է ասեմ, որ դեռևս 2020 թվականի փետրվարին, երբ որ առաջիկայում սահմանադրական հանրաքվե էր, որը Քովիդի համավարակի պատճառով չեղարկվեց, ես այն ժամանակ էլ եմ խոսել նոր Սահմանադրության անհրաժեշտության մասին: Այն հայեցակարգը, որը կա, արդի չէ»,- նշեց վարչապետը:
«Նոր Սահմանադրության վերաբերյալ չկա հայեցակարգ, չկա տեքստ, նոր Սահմանադրության վերաբերյալ կա քաղաքական խոսույթ և քաղաքական օրակարգ իմ կողմից առաջարկվող ՀՀ ժողովրդին՝ իր հիմնավորումներով: Ե՞րբ կլինի հանրաքվե. երբ ես և մեր քաղաքական թիմը և մենք բոլորով զգանք, որ Հայաստանի Հանրապետության ժողովուրդը բավարար չափով տեղեկացված է, թե ինչ է տեղի ունենում, ինչի համար և ինչ բովանդակություն է, ինչ խնդիր է լուծելու: Ես նկատի ունեմ, որ նաև ես ինչքան գիտեմ և աչքովս էլ է ընկել մեկ-երկու բան, որ չգիտեմ ինչ-որ ժամկետներ են ասում՝ էս տարի, մյուս տարի. դա գործնականում հնարավոր չէ, դժբախտաբար: Այս փուլի իմ խնդիրը հանրության, ժողովրդի հետ ունենալ խոսակցություն այս թեմայով»,- ասաց նա:
Նիկոլ Փաշինյանն ընդգծեց, որ Սահմանադրության շուրջ որոշումներ չի կայացնում Կառավարությունը կամ ԱԺ-ն, չնայած Կառավարությունն ու ԱԺ-ն կարող են նախաձեռնել նման գործընթաց: «Որոշում կայացնում է ժողովուրդը, իսկ որպեսզի ժողովուրդը որոշում կայացնի, ժողովուրդը պետք է տեղեկացված լինի: Ֆունդամենտալ հարցը, որը պետք է լուծվի, պոտենցիալ նոր Սահմանադրությամբ հետևյալն է. ՀՀ ժողովուրդը դե յուրե և դե ֆակտո պետք է ինքն իր համար արձանագրի ՀՀ-ում ապրելու կանոնները»,- ասաց վարչապետ Փաշինյանը:
