Նիգերիայում զինված անձինք հինգշաբթի առևանգել են 227 աշակերտի Կադունա նահանգի հյուսիսային Կուրիգա քաղաքում։ Ըստ տեղի ուսուցիչների, որոնց խոսքերը մեջբերում է Reuters-ը, առևանգումը դպրոցում ամենախոշորն է եղել 2021 թվականից ի վեր:
Նշվում է, որ գրոհայինները դպրոցի վրա հարձակվել են առավոտյան, միջնակարգ դպրոցից առևանգել են 187, իսկ նախակրթարանից՝ մոտ 40 աշակերտի։
Նահանգի ղեկավարը խոստացել է ապահովել բոլոր դպրոցականների ազատ արձակումը:
Նիգերիայում երեխաների առևանգումը սովորական երևույթ է դառնում: 2014 թվականին «Բոկո հարամ» ահաբեկչական խմբավորումը Նիգերիայի հյուսիսային Չիբոկ քաղաքում առևանգել էր 276 աշակերտուհու։ 2021 թվականի դրությամբ նրանցից 100-ից ավելին անհայտ կորած է համարվում։ Save the Children կազմակերպության տվյալով՝ 2021 թվականի հունվարից օգոստոս Նիգերիայում առևանգվել է ավելի քան 1000 երեխա:
