Սահմանադրական դատարանի դատավորի թափուր տեղի համար առաջադրված Դավիթ Բալայանի թեկնածությունն Ազգային ժողովում ներկայացրեց Վճռաբեկ դատարանի նախագահ Լիլիթ Թադևոսյանը:
Ըստ այդմ՝ Դավիթ Բալայանը 1997-1999 թթ. եղել է Փաստաբանների միության անդամ, 1999-2001 թթ.՝ ՀՀ քրեական և զինվորական գործերով Վերաքննիչ դատարանի դատավորի օգնական: 2001-ին նշանակվել է Գեղարքունիքի մարզի առաջին ատյանի դատարանի դատավոր, իսկ 2005-ին՝ Երևան քաղաքի Աջափնյակ և Դավթաշեն վարչական շրջանների ընդհանուր իրավասության առաջին ատյանի դատարանի դատավոր: 2015-ին նշանակվել է Երևան քաղաքի Շենգավիթ վարչական շրջանի ընդհանուր իրավասության առաջին ատյանի դատարանի նախագահ, 2017-ին շարունակել է պաշտոնավարել որպես Երևան քաղաքի ընդհանուր իրավասության դատավոր, իսկ 2022 թ. դեկտեմբերի 23-ից պաշտոնավարում է որպես Երևան քաղաքի առաջին ատյանի ընդհանուր իրավասության քրեական դատարանի դատավոր: Ծառայել է ՀՀ սահմանապահ զորքերում:
Դավիթ Բալայանն իր ելույթի ժամանակ տեղեկացրեց, որ 25 տարուց ավելի է՝ աշխատում է ոլորտում, քննել է քրեական ու քաղաքացիական գործեր, նաև հանրային իրավահարաբերություններից բխող վեճեր: Դավիթ Բալայանի կողմից վերջնական դատական ակտ է կայացվել մոտ 1000 քրեական վարույթով, կայացրած ակտերի կայունությունը կազմում է 98 տոկոս: Ավելի քան 110 անձի նկատմամբ լրիվ կամ մասնակի կայացրել է արդարացման դատական ակտեր:
«2022-ի սեպտեմբերի 9-ին ՀՀ դատավորների ընդհանուր ժողովի դատավորների գործունեության գնահատման հանձնաժողովը որոշում է կայացրել իմ՝ 27.05.2018 թվականից մինչև 27.05.2022 թվականն ընկած ժամանակահատվածի գործունեությունը գնահատելու վերաբերյալ, և այն գնահատել է բարձր միավորով՝ 100 տոկոս»,- ասաց նա:
Դավիթ Բալայանը նաև նշեց՝ որպես դատավոր՝ առաջին անգամ ապահովել է մահացած մեղադրյալի արժանապատվության և հիմնական իրավունքների պաշտպանությունը, թեև օրենսդրությամբ նախատեսված չէին մահացած մեղադրյալի իրավունքների վերականգնման նպատակով գործի քննությունը շարունակելու հստակ ընթացակարգեր: Հետագայում մեկ այլ գործով ներկայացված խնդիրը դարձել է ՍԴ-ի քննության առարկա, որով բարձր դատարանը վերահաստատել է իր կողմից տրված իրավամեկնաբանությունները:
«Ուրախ կլինեմ, եթե ԱԺ-ն, պետական մարմինների միջև փոխադարձ հարգանքի սկզբունքին համահունչ, վերահաստատի Դատավորների ընդհանուր ժողովի քվեարկության արդյունքները՝ նպաստելով անհրաժեշտ սահմանադրական և քաղաքական մշակույթի ամրապնդմանը ՀՀ-ում»,- ասաց նա:
