«Դեղերի մասին» և կից օրենքներում առաջարկվող լրացումները և փոփոխությունները կնպաստեն դեղերի գրանցման, կլինիկական փորձարկումների ոլորտի կարգավորմանը, կներդաշնակեցվեն դեղերի ներմուծման գործընթացները: Այս մասին ԱԺ նիստում հայտնել է ՀՀ առողջապահության նախարար Անահիտ Ավանեսյանը և հավելել, որ 2016 թվականին ընդունված «Դեղերի մասին» օրենքի կիրարկման ընթացքում բացահայտվել են մի շարք բացթողումներ, որոնք խոչընդոտում են ոլորտի լիարժեք կարգավորմանը: Որոշակի խնդիրներ են արձանագրվել նաև ՀՀ առողջապահական և աշխատանքի տեսչական մարմնի իրավակիրառ պրակտիկայում, այդ թվում՝ փորձաքննությունների իրականացման մասով: Նախարարի դիտարկմամբ օրենքը չի նախատեսում դեղերի շրջանառության պետական կարգավորման ոլորտում փորձաքննություններ և մասնագիտական դիտարկումներ իրականացնող կազմակերպության սահմանում, ինչը մի շարք խնդիրներ է առաջացրել: Կառավարության որոշումները փոփոխելու համար անհրաժեշտ են լիազորող նորմեր:
Ըստ Անահիտ Ավանեսյանի՝ օրենքի էական թերություններից է նաև այն, որ նախատեսվում է զուգահեռ ներմուծման թույլտվության և դրա տրամադրման մերժման համակարգ՝ չհստակեցնելով կապը ներմուծման հավաստագրման գործընթացների և ներմուծման մերժման հիմքերի հետ: Նշվել է, որ փաթեթը կազմելիս հաշվի առնվել ներմուծող ընկերությունների առաջարկները:
Հարցուպատասխանի ընթացքում նախարարն անդրադարձել է կլինիկական փորձարկումների իրականացմանն ու դրանց նկատմամբ վերահսկողությանը, Վարդենիսում նախատեսված բժշկական կենտրոնում ախտաբանաանատոմիական հերձումների համար նախատեսված ենթակառուցվածքների տեղակայմանը, օրինական ճանապարհով դեղերի ներմուծման հեշտացմանը, դեղերի շուկայում գնային քաղաքականությանը և այլ հարցերի:
ԱԺ առողջապահության հարցերի մշտական հանձնաժողովի դրական եզրակացության մասին հայտնել է Հրաչյա Հակոբյանը:
