Ամերիկացի սենատորները համաձայնության են եկել երկար սպասված երկկուսակցական օրինագծի շուրջ՝ ընդհանուր 118 միլիարդ դոլարի լրացուցիչ ֆինանսավորման համար, որը միավորում է Ուկրաինային, Իսրայելին օգնելու և Միացյալ Նահանգների հարավային սահմանների ամրապնդմանն ուղղված միջոցները, գրում է BBC-ն:
ԱՄՆ նախագահ Ջո Բայդենը պաշտպանել է օրինագիծը և Կոնգրեսին խնդրել է չհետաձգել դրա ընդունումը։ Նախնական քվեարկությունը սպասվում է շաբաթվա կեսին, սակայն արդեն պարզ է, որ այն զգալի հակազդեցության կհանդիպի հանրապետական մեծամասնություն կազմող Ներկայացուցիչների պալատում, որի խոսնակ Մայք Ջոնսոնն արդեն ասել է, որ խոստանում է արգելափակել այն:
Օրենսդիրները չեն կարողանում համաձայնության գալ անցյալ տարվա աշնանից: Հիմնական պատճառը հանրապետականների և դեմոկրատների միջև տարաձայնություններն էին Մեքսիկայի հետ սահմանի ամրապնդման և ներգաղթային քաղաքականության խստացման միջոցառումների շուրջ։ Հանրապետականները պահանջել են խստացնել Մեքսիկայի հետ սահմանի հսկողությունը, և դա պայման է Ուկրաինային ցանկացած լրացուցիչ օգնություն քննարկելու համար։
Սենատորներն առաջարկել են 118 միլիարդ դոլարից 60,06 միլիարդը հատկացնել Ուկրաինային, 14,1 միլիարդը՝ Իսրայելին, 20,23 միլիարդը՝ Մեքսիկայի հետ սահմանի անվտանգությունն ապահովելու համար, 4,83 միլիարդը՝ աջակցելու Հնդկա-խաղաղօվկիանոսյան տարածաշրջանում ԱՄՆ գործընկերներին, 2,44 միլիարդը՝ ԱՄՆ կենտրոնական հրամանատարությանը և 2.44 միլիարդը՝ Կարմիր ծովում գործողություններին:
