ՀՀ-ին ԼՂ Կառավարության պարտավորությունների պահանջի զիջման մասին նախագիծը քննարկվել է և դեռ պետք է երկար քննարկվի, քանի որ խոսում ենք մի քանի հարթությունների մասին: Այդ մասին Ազգային ժողովի՝ դեկտեմբերի 22-ի արտահերթ նիստին «ՀՀ 2023 թվականի պետական բյուջեի մասին» օրենքում լրացումներ կատարելու մասին նախագծի քննարկման ժամանակ ասաց «Քաղաքացիական պայմանագիր» խմբակցության պատգամավոր Գևորգ Պապոյանը:
«Եթե բարոյական հարթությունում ենք դիտարկում, ապա սա փաստացի մեր հերթական աջակցությունն է ԼՂ-ից բռնի տեղահանված մեր հայրենակիցներին մի քանի հարյուր միլիարդի տեսքով: Սա ուղիղ այդ աջակցության մասին է խոսում, որովհետև, փաստացի, այդ մարդիկ այդ պարտավորություններ այս պահին ունեն, բայց հասկանալի պատճառներով դրանք չենք կարող մարել, և պետությունն աջակցում է մեր այդ քաղաքացիներին:
Տնտեսական առումով եթե դիտարկում ենք, ապա այստեղ նույնպես շատ կարևոր հարցեր կան, որովհետև մեր ֆինանսական համակարգի կայունությունը վերաբերում է մեր բոլոր քաղաքացիներին, առանց բացառության՝ բոլոր քաղաքացիներին, որովհետև եթե ֆինանսական համակարգը կայունության խնդիր ունենա, ապա խնդիր կունենան նաև ՀՀ բոլոր քաղաքացիները, հետևաբար, այս նախագիծը ՀՀ բոլոր քաղաքացիների համար է»,- ասաց պատգամավորը:
Գևորգ Պապոյանը խոսեց նաև նախագծի քաղաքական նշանակության մասին: Այդ տեսանկյունից նա կարևորեց հարցի արդարացի լուծումը: Եթե, օրինակ, քաղաքացին հավատացել է, գնացել, հիփոթեքային վարկ է վերցրել Ստեփանակերտում տուն գնելու նպատակով, ապա այդ քաղաքացուն պետք է աջակցել: Պետք է աջակցել նաև այդ քաղաքացուն վարկ տված բանկին, կարծում է Պապոյանը՝ միևնույն ժամանակ կարևորելով այդ պահանջի իրավունքը:
«Ցանկացած պահի, եթե պարզվի, որ կեղծ և շինծու գործարք է եղել, ասենք՝ 100 միլիոն դրամի հող են դրել, բայց 1 միլիարդ դրամ փող են վերցրել, գնալու ենք և այդ 900 միլիոն դրամը վերցնելու ենք, ու, բնականաբար, այստեղ զիջում չի լինելու: Սա ակնհայտ է, և այդտեղ մենք ժամկետային սահմանափակում չունենք՝ 1 շաբաթ հետո կբացահայտե՞նք, 1 տարի հետո՞, թե՞ 10 տարի հետո»,- ասաց պատգամավորը և հավելեց, որ նախագիծը «բավականին հավասարակշռված» է համարում, և որ իրավապահ համակարգը ևս լուրջ և խորքային աշխատանք ունի այս հարցում:
