Շիրակի մարզ այցի երկրորդ օրը` դեկտեմբերի 16-ին, վարչապետ Նիկոլ Փաշինյանը և տիկին Աննա Հակոբյանը այցելել են Սերգեյ Մերկուրովի տուն-թանգարան և Գյումրու ժողովրդական ճարտարապետության և քաղաքային կենցաղի թանգարան: Շրջայցի ընթացքում վարչապետին և տիկնոջը ներկայացրել են թանգարաններում ներկայացված ցուցանմուշները:
.JPG)
Վարչապետի տիկնոջ հաջորդ կանգառը Մարիամ և Երանուհի Ասլամազյան քույրերի պատկերասրահում էր: Աննա Հակոբյանը դստեր` Արփիի հետ շրջել է բոլոր ցուցասրահներում, ծանոթացել Ասլամազյան քույրերի և մի շարք այլ հայտնի ստեղծագործողների աշխատանքներին:
Պատկերասրահի տնօրեն Կարեն Բարսեղյանը պատմել է Ասլամազյան քույրերի գործունեության մասին: Աշխատակիցների խոսքով՝ Մարիամ Ասլամազյանը շրջագայել է ավելի քան 50 երկրում, ոգեշնչվել ու կտավներ պատկերել: Մարիամ Ասլամազյանին հատկապես գրավել է Հնդկաստանը, որտեղ եղել է 3 անգամ:
Աշխատակիցները պատմել են, որ թանգարանը տարեկան շուրջ 10 000 այցելու է ունենում: Աննա Հակոբյանին ներկայացրել են, որ պատկերասրահում անցկացվում են նաև ջազի օրերը:
Տնօրենը ներկայացրել է առաջիկա ծրագրերը, որոնցից հատուկ առանձնացրել է կույրերի համար մշակած ծրագիրը, որով նախատեսում են որոշ կտավներ կույրերի համար շոշափելու միջոցով դարձնել ընթեռնելի: Նպատակ ունեն նաև Ակսել Բակունցի թանգարանի հետ գործակցել` Սյունիքի թեմայով նկարները ցուցադրել Գորիսում, ապա կտավների հետ Գյումրի բերել Մարիամ Ասլամազյանի և Ակսել Բակունցի նամակագրությունը, հետագայում դրանք նաև թվայնացնել: Աննա Հակոբյանը բարձր է գնահատել գաղափարները և հույս հայտնել, որ բոլորը առաջիկա տարում կիրականանան:
1987 թվականին քույրերը 620 աշխատանք են նվիրել Գյումրուն և հիմնել են պատկերասրահը: 88-ի երկրաշարժից հետո շենքը մասամբ վնասվել է, և պատկերասրահը ավելի քան մեկ տասնամյակ գործունեությունը դադարեցրել է, վերաբացվել է 2004-ին: Վերջին 5 տարիների ընթացքում կատարվել են նորոգման աշխատանքներ, ներդրվել են ժամանակակից ու նորարար տեխնիկական միջոցներ: Ամիսներ առաջ էլ սուբվենցիոն ծրագրով վերանորոգվել է պատկերասրահի պատշգամբը` արվեստային նոր միջավայր տալով պատկերասրահին:
Վարչապետի տիկին Աննա Հակոբյանը Գյումրիում ներկա է եղել նաև «Դեղձանիկ» վոկալ-էստրադային համույթի համերգին: Այն անցկացվել է Գյումրու կամերային երաժշտության դահլիճում, որը բացվել է 2023-ի մարտին: Գյումրու մանկապատանեկան արվեստի պալատն այս տարի նշում է հիմնադրման 100-ամյակը, որին էլ նվիրված է «Դեղձանիկ» համույթի համերգը:
.JPG)
