Պարեկներ, ոստիկանական մեքենաներ, Ոստիկանության զորքերի նվագախումբ ու երգչախումբ։ Դեկտեմբերի 1-ին Վանաձորում տեղի է ունեցել «Եղի՛ր ուժ մեր երկրի համար» հանրային իրազեկման հերթական միջոցառումը։
Ներկա են եղել ՆԳ նախարար Վահե Ղազարյանը, տեղակալ Արփինե Սարգսյանը, ոստիկանության պետ-ՆԳ նախարարի տեղակալ, ոստիկանության գեներալ-մայոր Արամ Հովհաննիսյանը, Լոռու մարզպետ Արամ Խաչատրյանը, ՆԳՆ և ոստիկանության ղեկավար կազմը, համայնքային իշխանության ներկայացուցիչներ, քաղաքացիներ։
Ելութներ ունեցան ՆԳ նախարարն ու Լոռու մարզպետը։
Նրանք նշել են, որ Պարեկային ծառայությունը կայացել է նաև Լոռու մարզում, և այդ կապակցությամբ ընդգծել են, մասնավորապես, կին պարեկների բարեխիղճ ծառայությունը։ ՆԳ նախարարն ու Լոռու մարզպետը կոչ են արել կանանց՝ դիմել և իրենց ծառայությամբ ուժ լինել մեր երկրի համար։
Լոռու մարզի բնակիչները հնարավորություն են ունեցել ծանոթանալու պարեկային ծառայության առանձնահատկություններին, օգտագործվող հատուկ միջոցներին, ծառայողական մեքենաներին։ Իսկ ովքեր ցանկանում էին դիմել ստորաբաժանումում ծառայելու համար՝ տեղում ներկայացրին դիմումներ։
Հիշեցնենք, որ Պարեկային ծառայությունում պաշտոնի նշանակվելու նպատակով ՆԳ նախարարության կրթահամալիրում ուսուցման համար ընդունելության մրցույթի դիմումների ընդունումը երկարաձգվել է մինչև դեկտեմբերի 15-ը։
Նշենք, որ տեղերի գերակշիռ մասը նախատեսված է կանանց համար:
