Առողջապահության նախարարի առաջին տեղակալ Լենա Նանուշյանը ՉԺՀ Ցզյանսի նահանգի Նանչան քաղաքի Նոր Գանցզյան շրջանում մասնակցել է Շանհայան համագործակցության կազմակերպության (ՇՀԿ) «Ավանդական բժշկության համաժողով 2023»-ին, որի առանցքն է եղել անդամ երկրներում համագործակցության ընդլայնումը:
«Առողջապահության ոլորտը հայ-չինական երկկողմ հարաբերությունների առանցքային ուղղություններից է: Ուստի կարևորում ենք այս հարթակի օգտագործումը ինչպես Չինաստանի, այնպես էլ Շանհայան համագործակցության կազմակերպության այլ երկրների հետ համագործակցությունը զարգացնելու ու խորացնելու նպատակով»,- նշել է Լենա Նանուշյանը։
Համաժողովի շրջանակում նախարարի տեղակալը երկկողմ հանդիպումներ է ունեցել ՇՀԿ անդամ պետությունների պատվիրակների հետ:
ՉԺՀ Չինական ավանդական բժշկության ազգային ադմինիստրացիայի ղեկավար պրոֆեսոր Յու Յանհոնգի հետ հանդիպմանը Լենա Նանուշյանը շնորհակալություն է հայտնել ՀՀ առողջապահության ոլորտի բարեփոխումներին ցուցաբերած աջակցության համար: Քննարկվել է Հայաստանում սիմուլյացիոն բժշկական կենտրոն ստեղծելու հնարավորությունը։
Նախարարի տեղակալն այցելել է նաև ՉԺՀ Նանչան քաղաքի Կլինիկական ուսումնական և ցուցադրական ազգային կենտրոն, որտեղ ներկայացվել են բժշկական գործնական հմտությունների զարգացման հնարավորությունները:
