Արդարադատության նախարարի տեղակալ Կարեն Կարապետյանը ելույթով է հանդես եկել Կոռուպցիայի կանխարգելման հանձնաժողովի ձևավորման 4-րդ տարեդարձին և շնորհավորել աշխատակիցներին օրվա առթիվ: Այս մասին տեղեկացրին ՀՀ արդարադատության նախարարությունից:
Նախարարի տեղակալը նշել է, որ Կառավարությունը 2018 թվականից ի վեր որդեգրել է կոռուպցիայի դեմ անշեղ պայքարը որպես իր քաղաքականության հիմնական ու գերակա ուղղություններից մեկը, ինչը շարունակաբար իր ամրագրումն է ստացել Կառավարության գործունեության ծրագրերով և վերափոխման հայեցակարգերով։ Կառավարությունը հետևողական ջանքեր է գործադրել Հանձնաժողովի՝ որպես համապատասխան անկախության երաշխիքներով օժտված կոռուպցիայի կանխարգելման մասնագիտացված ինքնավար մարմնի ձևավորման, կայացման և ինստիտուցիոնալ կարողությունների շարունակական հզորացման, կանխարգելման գործիքների զարգացման ու արդիականացման գործում։
2019-2022 թթ. օրենսդրական բարեփոխումների արդյունքում էականորեն ընդլայնվել են ԿԿՀ-ի իրավասությունների շրջանակը և գործիքակազմը՝ շարունակաբար համապատասխանեցնելով միջազգային ստանդարտներին։ Հանձնաժողովին են վերապահվել բարեվարքության ուսումնասիրության, անհամատեղելիության պահանջների և այլ սահմանափակումների կիրառման ապահովումը, վարքագծի տիպային կանոնագրքերի ընդունումը, նվերների հաշվառման և կառավարման վերահսկումը, կուսակցությունների ընթացիկ ֆինանսական գործունեության վերահսկումը և մի շարք այլ գործառույթներ:
Հանձնաժողովի չորս տարիների գործունեությունը և շարունակական զարգացումն արդեն իսկ գրանցել են շոշափելի արդյունքներ։ Այն բարձր գնահատականի է արժանացել նաև մեր միջազգային գործընկերների կողմից, մասնավորապես՝ ԵԽ և դրա մոնիթորինգային մարմինների և Տնտեսական համագործակցության և զարգացման կազմակերպության, ՄԱԿ-ի «Կոռուպցիայի դեմ կոնվենցիայի» վերանայման մեխանիզմի շրջանակներում։ ԿԿՀ ինստիտուցիոնալ զարգացման և հանձնաժողովի հետևողական ջանքերի շնորհիվ մենք գրանցել ենք նաև միջազգային վարկանիշային առաջընթաց, որոնցից ամենակարևորն էր ԵԽ Կոռուպցիայի դեմ պայքարի պետությունների խմբի (ԳՐԵԿՈ) 4-րդ գնահատման շրջափուլի շրջանակներում և շահերի բախման, անհամատեղելիության պահանջների և այլ սահմանափակումների կառուցակարգերի, ինչպես նաև հանրային ծառայությունում վարքագծի կանոնների համակարգի ներդրման հանձնարարականների կատարումը։
Ելույթի ավարտին Կարեն Կարապետյանը վստահեցրել է, որ այս շարունակական բարեփոխումները էլ ավելի տեսանելի արդյունքներ կգրանցեն որդեգրված կոռուպցիայի դեմ անզիջում պայքարի և հասարակության մոտ դրա դեմ զրո հանդուրժողականության մշակույթի ձևավորման գործում։
