Նախարար Վահան Քերոբյանը նոյեմբերի 1-ին ընդունել է Վերակառուցման և զարգացման եվրոպական բանկի (ՎԶԵԲ) Կովկասի տարածաշրջանային տնօրեն Ալկիս Դրակինոսին և Հայաստանում ՎԶԵԲ գրասենյակի ղեկավար Գեորգի Ախալկացիին՝ ՎԶԵԲ-ի կողմից Հայաստանում իրականացվող ծրագրերը և համագործակցության հեռանկարները քննարկելու նպատակով։
Էկոնոմիկայի նախարարությունից տեղեկացնում են, որ հանդիպման ընթացքում կողմերը քննարկել են գյուղատնտեսության, մասնավորապես օրգանական գյուղատնտեսության, ջերմոցաշինության, «կանաչ տնտեսության» զարգացման, թեթև արդյունաբերության, ձեռներեցության ոլորտում համագործակցությանը վերաբերող հարցեր։
Անդրադարձ է կատարվել նաև կապիտալի շուկայի զարգացմանը, մասնավոր հատվածի մրցունակության բարձրացմանը և պետություն-մասնավոր գործընկերությանը։
Նախարարը ներկայացրել է Գյումրիի «չոր նավահանգստի» և արդյունաբերական պարկերի ստեղծման նախագծերը, անդրադարձել նաև ՀՀ-ում տնտեսապես բարդ ապրանքների արտադրությամբ զբաղվող առևտրային ընկերություններին պետական աջակցության տրամադրման նոր ծրագրին։
