Հայաստանի Հանրապետությունը երբեք ոչ մի տեղ իր որևէ տարածքի նկատմամբ իր ինքնիշխանության և իրավազորության որևէ սահմանափակման չի համաձայնել, նման խոստում չի տվել՝ Եվրոպական խորհրդարանում ելույթի ժամանակ հայտարարեց ՀՀ վարչապետ Նիկոլ Փաշինյանը:
«Հայաստանը և Ադրբեջանը իրենց սուվերենության, իրավազորության հիման վրա, առանց վերոհիշյալ «միջանցքային» խոսակցությունների, միմյանց համար պետք է բացեն իրենց ճանապարհները: Այդ ճանապարհների սահմանային կետերում պետք է գործեն սահմանային և այլ վերաբերելի հսկողական ծառայություններ՝ երկրների իրավազորության, սուվերենության, օրենսդրության հիման վրա: Սա պետք է արվի փոխադարձության և հավասարության սկզբունքով, և մենք պատրաստ ենք օր առաջ գնալ այդպիսի լուծումների: Պատրաստ ենք վերականգնել Մեղրիի երկաթուղին, որը Հայաստանի հարավով կկապի ոչ միայն Հայաստանը և Ադրբեջանը, այլև Հայաստանի հարավային շրջանները հյուսիսարևմտյան շրջանների հետ, Ադրբեջանի հարավարևմտյան շրջանները Նախիջևանի Ինքնավար Հանրապետության հետ, հետագա շարունակությամբ՝ Հայաստանը՝ Թուրքիայի հետ, Ադրբեջանը՝ Թուրքիայի հետ, Վրաստանը, Ադրբեջանը, Հայաստանը՝ ԻԻՀ-ի հետ, Արևելքը՝ Արևմուտքի հետ՝ Կասպից ծովից մինչև Միջերկրական, հյուսիսը՝ հարավի հետ՝ Ծոցից մինչև Սև ծով: Հայաստանում այս նախագիծն անվանում են «Հայկական խաչմերուկ», բայց կարծում եմ՝ այս նախագիծն ավելի տարածաշրջանայնացնելու, ռեբրենդինգի ենթարկելու և Եվրոպական խորհրդարանի բարձր ամբիոնից «Խաղաղության խաչմերուկ» անվանելու ժամանակն է: Եվ այս անունը նույնքան կարևոր և ընդունելի է մեզ համար»,- ասաց վարչապետը:
Նույն տրաաբանությամբ, մենք պատրաստ ենք ավտոճանապարհների բացմանը նույնպես: ՀՀ-ն պատրաստ է իր տարածքում ապահովել բեռների, տրանսպորտային միջոցների, մարդկանց, խողովակաշարարերի, էլեկտրական գծերի անվտանգությունը, որովհետև խաղաղության խաչմերուկը ենթադրում է այդ թվում խողովակաշարերի և էլեկտրագծերի անցում:
Նման լուծումները շատ կարևոր են նաև ՀՀ-ի համար, որովհետև մեր երկիրը արդեն 30 տարի շրջափակման մեջ է Ադրբեջանի և Թուրքիայի կողմից:
Ինչպես տեսնում եք, Հայաստանին տարածաշրջանի տրանսպորտային կոմունիկացիաների բացմանը խոչընդոտելու մեջ մեղադրելու որևէ հիմք չկա: Կան վերլուծություններ, որ պաշտոնական Բաքուն միջանցքային խոսույթը նենգափոխում է տարածաշրջանում նոր պատերազմ հրահրելու, Հայաստանից նորանոր տարածքներ օկուպացնելու կամ Հայաստանը շրջափակման մեջ պահելու համար: Նման բան թույլ տալ չի կարելի: Վերը բերված բոլոր սկզբունքները մշակվել և համաձայնեցվել են ԵՄ խորհրդի նախագահի և Ադրբեջանի նախագահի մասնակցությամբ, և մենք պատրաստ ենք այդ պայմանավորվածությունները կյանքի կոչել»,- ասաց Փաշինյանը:
