ՌԴ արտաքին գործերի փոխնախարար Միխայիլ Գալուզինը РБК-ի հետ հարցազրույցում ասել է, որ սեպտեմբերի 19-ին Ադրբեջանի ձեռնարկած գործողության և դրան հաջորդած՝ Լեռնային Ղարաբաղի Հանրապետության ինքնալուծարման որոշումից հետո Բաքվի և Երևանի միջև կոնֆլիկտային իրավիճակում դեռ վերջակետ չի դրվել: Եվ այստեղ, ըստ նրա, արդիական է մնում Ռուսաստանի, Ադրբեջանի և Հայաստանի ղեկավարների միջև եռակողմ պայմանավորվածությունների համալիրը։ Խոսքը վերաբերում է կարևոր բաղադրիչների շուրջ պայմանավորվածությունների ձեռքբերմանը, ինչպիսիք են՝ Հայաստանի և Ադրբեջանի միջև տրանսպորտային հաղորդակցությունների և տնտեսական կապերի ապաշրջափակումը, սահմանի սահմանազատումը՝ դրա հետագա սահմանազատմամբ, խաղաղության պայմանագրի ստորագրումը և շփումների հաստատումը հասարակական գործիչների, փորձագիտական համայնքների, Ադրբեջանի և Հայաստանի խորհրդարանականների միջև։
«Այս բոլորը պետք է հանգեցնեն կարգավորման փոխընդունելի պայմանների, որոնք ամրագրվելու են ապագա պայմանագրում»,- ասել է Գալուզինը և ընդգծել, որ ռուսական կողմը միշտ եղել և մնում է հավատարիմ Հայաստանի հետ դաշինքին և ռազմավարական գործընկերությանը, այն պայմանավորվածություններին, որոնք կան։
«Մեզ համար հիմք է ռուս և հայ ժողովուրդների դարավոր սերտ կապերի պահպանման և ամրապնդման անհրաժեշտությունը, որոնք շատ բան են տվել երկու ժողովուրդներին և երկու երկրներին նրանց զարգացման համար»,- ասել է ռուս դիվանագետը։
