Հայաստանում է գտնվում ԵՄ ճգնաժամային կառավարման հարցերով հանձնակատար Յանեզ Լենարչիչի գլխավորած պատվիրակությունը: Կառավարությունում քննարկումից հետո ՀՀ փոխվարչապետ Տիգրան Խաչատրյանը և Յանեզ Լենարչիչը հանդես եկան հայտարարությամբ:
«Հանձնակատարի հետ խոսել ենք այն հիմնական խնդիրներ շուրջ, որոնք առաջացել են Ադրբեջանի կողմից շարունակական ուժի կիրառման և հայատյաց քաղաքականության իրագործման արդյունքում ԼՂ-ից բռնի տեղահանվածների հումանիտար աջակցության առնչությամբ»,- ասաց Տիգրան Խաչատրյանը:
Փոխվարչապետը նաև տեղեկացրեց, որ խոսել են նաև տեղահանված և Հայաստանում ապաստան գտած ավելի քան 100 հազար հայրենակիցների հրատապ կարիքների գնահատումից, այդ թվում՝ առողջապահական, սոցիալական, հոգեբանական, ֆինանսական հարցերի շուրջ:
«ՀՀ Կառավարությունը բարձր է գնահատում այն արագ արձագանքը, որ ԵՄ-ն և նրա անդամ պետությունները ցուցաբերել և շարունակում են ցուցաբերել տեղահանված մեր հայրենակիցների առաջնահերթ կարիքների հասցեագրման ուղղությամբ:
Հանձնակատարի հետ կարևորել ենք հումանիտար բնույթի լայնածավալ անելիքների վերաբերյալ ՀՀ Կառավարության և ԵՄ-ի կողմից գործադրվող ջանքերը համաձայնեցնելու, ստացվող հումանիտար աջակցությունը բռնի տեղահանվածների կարիքներին ուղղելու հարցում համագործակցության միասնական հարթակի ձևավորման և այդ ձևաչափով մեր գործողությունների արդյունավետությունը բարձրացնելու հարցերը»,- ասաց նա:
Տիգրան Խաչատրյանը նաև ասաց, որ որպես առաջնահերթ գերակայություն՝ առանձնացվել է բռնի տեղահանվածների կարճաժամկետ, միջնաժամկետ և երկարաժամկետ կարիքների գնահատման կարևորությունը:
«Քննարկման ընթացքում եկել ենք այն համաձայնության, որ ԵՄ-ն կշարունակի ավելացված աջակցություն ցուցաբերել բոլոր անհրաժեշտ ուղղություններով՝ հաշվի առնելով այն մեծ փորձառությունը, որն ունի ճգնաժամային կառավարման հարցերում:
Համոզվածություն ենք հայտնում, որ ԵՄ-ի կողմից ցուցաբերված աջակցությունն էապես կնպաստի նրան, որ ՀՀ Կառավարության կողմից իրականացվող ծրագրերն առավելագույն արդյունավետությամբ լուծեն բռնի տեղահանված մեր հայրենակիցների առաջնահերթ կարիքները»,- ասաց փոխվարչապետը:
