Պրոբացիայի ծառայության ղեկավար Արամ Նիկոյանը և Երևանի քաղաքապետարանի աշխատակազմի քարտուղարի ժամանակավոր պաշտոնակատար Շավարշ Գրիգորյանը կնքել են համագործակցության հուշագիր: Այս մասին հայտնում են արդարադատության նախարարությունից:
«Հուշագրի նպատակն է՝ նպաստել փոխհամագործակցության ակտիվացմանը, ապահովելով Պրոբացիայի ծառայության շահառուների ներգրավումը հանրօգուտ աշխատանքներին, որը ներառում է հասարակական տարածքների՝ զբոսայգիների, խաղահրապարակների, հուշակոթողների և այլ տարածքների բարեկարգման աշխատանքները: Դա ծառայության շահառուներին կօգնի ձևավորել օգտակար լինելու գիտակցություն, հասարակամետ և իրավագիտակից վարք, ինչպես նաև ձեռք բերել նոր հմտություններ ու փորձառություն:
Բացի այդ՝ հուշագրով պայմանավորվածություն է ձեռք բերվել փոխհամագործակցել Պրոբացիայի շահառուների՝ չվարձատրվող հիմունքներով, հանրային աշխատանքների ձևով պատժի կատարման ներգրավման և ապահովման գործընթացում»,- ասված է հաղորդագրության մեջ:
