Ամենշաբաթյա ճեպազրույցի ժամանակ, մեկնաբանելով Հայաստանում Ֆրանսիայի արտգործնախարարի հայտարարությունները, Մարիա Զախարովան նշել է.
«Ֆրանսիան չէ, որ պետք է խոսի երկրների միջև հարաբերությունները կարգավորելու պարտավորությունների մասին: Երեկ Ֆրանսիայի ԱԳ նախարար Կատրին Կոլոննան Երևանում բազմաթիվ ամպագոռգոռ հայտարարություններ արեց, որ Ռուսաստանը, իբր, չի կատարել ոչ մի պարտավորություն Ադրբեջանի և Հայաստանի միջև հարաբերությունները կարգավորելու հարցում։
Ֆրանսիան չէ, որ պետք է խոսի պարտավորությունների մասին: Ֆրանսիային հիշեցնեմ, որ Մինսկի պայմանավորվածությունների կատարման հովանավորն ու երաշխավորն էր։ Ի՞նչ իմացանք պարոն Օլանդից։ Որ նրանք չէի՞ն պատրաստվում դրանք իրականացնել: Եթե ես լինեի Կատրին Կոլոննան, կնախընտրեի լռել այլ երկրների միջև հարաբերությունները կարգավորելու երաշխիքների և պարտավորությունների մասին, որտեղ Ֆրանսիան իրեն միջնորդ է համարում։ Ավելի լավ կլիներ, որ նա նախ զեկուցեր Մինսկի պայմանավորվածությունների մասին։ Ի վերջո, դա ՄԱԿ-ի Անվտանգության խորհրդի բանաձև է»,- ասել է նա:
«Ռուսաստանն էր, որ կանգնեցրեց արյունահեղությունը 2020 թվականի նոյեմբերի 9-ին, համաձայնեցրեց 2020-2022 թվականների մի շարք եռակողմ հայտարարություններ, այսպես կոչված ճանապարհային քարտեզը Երևանի և Բաքվի հաշտեցման համար։ Իսկ Պրահայում և Բրյուսելում Հայաստանի ղեկավարությանը համոզեցին մոռանալ Լեռնային Ղարաբաղի հայերի իրավունքների ու անվտանգության մասին»,- եզրափակել Է Զախարովան։
