Ռուսաստանի ներքին գործերի նախարարությունը հետախուզում է հայտարարել Միջազգային քրեական դատարանի (ՄՔԴ) նախագահ Պետեր Հոֆմանսկու նկատմամբ։
Նախարարության որոնողական տվյալների բազայի համաձայն՝ Լեհաստանի քաղաքացի, 1956 թվականին ծնված Պետեր Յոզեֆ Հոֆմանսկին հետախուզվում է ՌԴ քրեական օրենսգրքի հոդվածով։ ՆԳՆ-ն այլ մանրամասներ չի հայտնում։
Հայտնի է միայն, որ մարտին Միջազգային քրեական դատարանի նախաքննական պալատը Ռուսաստանի նախագահ Վլադիմիր Պուտինին և երեխաների օմբուդսմեն Մարիա Լվովա-Բելովային ձերբակալելու օրդեր է տվել՝ կապված Ուկրաինայում տեղի ունեցող իրադարձությունների հետ, մասնավորապես՝ «Ռուսաստանի կողմից Ուկրաինայի գրավյալ տարածքներից մարդկանց անօրինական արտաքսման մասին գործի քննության շրջանակներում, ինչը վնաս է հասցրել ուկրաինացի երեխաներին»:
ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ «Միջազգային քրեական դատարանի որոշումները ոչ մի նշանակություն չունեն մեր երկրի համար, այդ թվում՝ իրավական տեսանկյունից»։
Ռուսաստանի Դաշնության քննչական կոմիտեն էլ քրեական գործ է հարուցել Միջազգային քրեական դատարանի (ՄՔԴ) դատավորների դեմ, նրանց կալանքի օրդեր են տվել։
