Գերմանիայի իշխանությունները ուշադիր հետևում են Լեռնային Ղարաբաղում տիրող իրավիճակին։ Նրանք մտահոգված են տարածաշրջանում հայ բնակչության վիճակով։ Այդ մասին լրագրողներին ճեպազրույցում հայտարարել է Գերմանիայի ԱԳՆ ներկայացուցիչը։
«Ռազմական ուժի կիրառումը, որը մենք նկատեցինք անցյալ շաբաթ Ադրբեջանի կողմից, անընդունելի է: Էթնիկ հայերի վտարումը կամ բռնի վերաբնակեցումը՝ նույնպես»,- ասել է նախարարության ներկայացուցիչը։
Ըստ Գերմանիայի ԱԳՆ-ի՝ Ադրբեջանի իշխանությունները պետք է ապահովեն Լեռնային Ղարաբաղում խաղաղ բնակչության իրավունքների պաշտպանությունը, զինված ուժերն էլ պետք է պահպանեն միջազգային մարդասիրական իրավունքը։ «Մենք հետևելու ենք Ադրբեջանի քայլերին»,- հավելել է ԱԳՆ ներկայացուցիչը։ Նա նշել է, որ գերմանական կողմի տեսանկյունից «Լեռնային Ղարաբաղում ռուս խաղաղապահները նույնպես պարտավոր են ապահովել խաղաղ բնակչության պաշտպանությունը: Դա նրանց խնդիրն է»։
Նա հիշեցրել է, որ տարածաշրջանում աշխատում են ԵՄ դիտորդները։ «Բայց ԵՄ առաքելությունը գործում է միայն սահմանի հայկական կողմում և չի կարող զեկուցել Լեռնային Ղարաբաղից»,- բացատրել է Գերմանիայի ԱԳՆ ներկայացուցիչը:
