Սեպտեմբերի 11-ին և 12-ին Մարդու իրավունքների պաշտպանի աշխատակազմը Ռաուլ Վալլենբերգի անվան մարդու իրավունքների և մարդասիրական իրավունքի ինստիտուտի երևանյան գրասենյակի հետ համատեղ իրականացրել է կանխարգելման ազգային մեխանիզմի աշխատակիցների կարողությունների զարգացմանն ուղղված հանդիպում-քննարկում։ Այդ մասին ասված է ՄԻՊ-ի Ֆեյսբուքի էջում:
«Երկօրյա աշխատաժողովի ընթացքում քննարկվել են քրեակատարողական հիմնարկներ մոնիթորինգային այցերն ավելի արդյունավետ դարձնելու մեխանիզմները, մասնավորապես՝ առկա խնդիրները վեր հանելու նպատակով կիրառվող ուղեցույցները, ստուգաթերթերը, գործիքակազմը, մշտադիտարկման մեթոդաբանությունը։
Անդրադարձ է կատարվել նաև ՔԿՀ-ներում պահվող անձանց, մասնավորապես խոցելի խմբերի՝ կանանց, անչափահասների, հաշմանդամություն ունեցող անձանց իրավունքների ապահովմանն առնչվող հարցերին։
Աշխատանքային քննարկման ժամանակ վեր են հանվել մշտադիտարկման այցերի ընթացքում հաճախ հանդիպող խնդիրները, մշակվել են դրանց վերհանման գործիքակազմը՝ հաշվի առնելով միջազգային լավագույն փորձը։
Մարդու իրավունքների պաշտպանի աշխատակազմի կարողությունների զարգացմանն ուղղված նման միջոցառումները կրելու են շարունակական բնույթ»,- նշված է գրառման մեջ։
