ՀՀ քննչական կոմիտեն ամփոփել է 2023 թ. առաջին կիսամյակի ընթացքում անչափահասների կողմից կատարված հանցագործությունների, ինչպես նաև անչափահասների նկատմամբ կատարված հանցագործությունների վերաբերյալ քրեական վարույթների ընդհանուր շարժընթացը։
Ըստ այդմ՝ 2023 թ. 1-ին կիսամյակի ընթացքում անչափահասների կողմից կատարված հանցագործությունների վերաբերյալ ՀՀ քննչական կոմիտեի ստորաբաժանումներում քննվել է 220 քրեական վարույթ։
Նշված վարույթներից 24-ն ավարտվել են մեղադրական եզրակացությամբ և 33 անչափահասի նկատմամբ ուղարկվել դատարան։ 60 վարույթ կարճվել է, որից 36-ը` ռեաբիլիտացնող, իսկ 24-ը՝ ոչ ռեաբիլիտացնող հիմքով։ 23 վարույթով ավարտվել են վարութային և ապացուցողական գործողությունները, 106-ի նախաքննությունը շարունակվում է:
Դատարան ուղարկված վարույթներից 1-ը քննվել է սպանության, 5-ը՝ առողջությանը ծանր վնաս պատճառելու, 1-ը՝ կողոպուտի, 6-ը՝ գողության, 2-ը՝ խուլիգանության, 1-ը՝ զենքի, 3-ը՝ թմրամիջոցների հետ կապված, 5-ը՝ այլ հանցագործությունների դեպքերի առթիվ:
Ոչ ռեաբիլիտացնող հիմքերով 33 անչափահասի նկատմամբ որոշում է կայացվել քրեական հետապնդում չիրականացնելու կամ դադարեցնելու մասին:
Նույն ժամանակահատվածում ՀՀ քննչական կոմիտեի վարույթում քննվել է անչափահասների նկատմամբ կատարված հանցագործությունների վերաբերյալ 699 քրեական վարույթ: Դրանցից 203-ը կարճվել են, որից 179-ը՝ ռեաբիլիտացնող, իսկ 24-ը` ոչ ռեաբիլիտացնող հիմքերով։
36 վարույթի նախաքննությունն ավարտվել է մեղադրական եզրակացությամբ և 35 անձի վերաբերյալ ուղարկվել է դատարան, 100-ով ավարտվել են վարութային և ապացուցողական գործողությունները, 340 քրեական վարույթ փոխանցվել է 2023 թվականի 2-րդ կիսամյակ:
Դատարան ուղարկված վարույթներից 3-ը քննվել են առողջությանը ծանր վնաս պատճառելու, 2-ը՝ մարդուն առևանգելու, 7-ը՝ սեքսուալ բնույթի գործողությունների, 24-ը՝ այլ հանցագործությունների դեպքերի առթիվ:
Դատարան ուղարկված վարույթներով 35 մեղադրյալից 16-ը հանդիսացել են անչափահաս տուժողի ընտանիքի անդամներ, 3-ը՝ խնամակալ, հոգաբարձու, 1-ը՝ բժշկական հաստատության աշխատակից: Մնացած 15 դեպքերը կատարվել են այլ անձանց կողմից:
Դատարան ուղարկված վարույթներով 44 տուժողից 24-ը եղել են մինչև 12, 7-ը՝ 12-14, 10-ը՝ 14-16, 3-ը՝ 16-18 տարեկան:
