Ուկրաինան անօդաչու թռչող սարքով հերթական անգամ փորձել է գրոհել Մոսկվայի և Մոսկվայի շրջանի օբյեկտները՝ հայտնում է Ռուսաստանի պաշտպանության նախարարությունը:
Գերատեսչության տվյալով՝ սարքը ոչնչացվել է Իստրինսկի շրջանի օդային տարածքում: Զոհերի և ավերածությունների մասին տեղեկություններ չկան։ Ռուսական լրատվամիջոցները գրում են, որ տեղի ունեցածի ֆոնին մայրաքաղաքի օդանավակայանների աշխատանքը ժամանակավորապես սահմանափակվել է:
Ուկրաինական կողմը հայտնում է, որ պայթյուններ են լսվել Խարկովում և Զապորոժիեի շրջանում:
Երկրի գլխավոր շտաբն էլ մանրամասներ է հայտնել մարտի դաշտում զարգացումների մասին: Նշվում է, որ ռուսական կողմը հարձակողական գործողություններ է իրականացնում Բախմուտ, Կրեմեննայա, Դոնեցկ և Ուգլեդար բնակավայրերի ուղղությամբ, Ուկրաինայի զինված ուժերը շարունակում են առաջ շարժվել հարավում։ Գլխավոր շտաբի տվյալով՝ ուկրաինացի զինվորականները հետ են մղում ռուսական ուժերի հարձակումները:
