Ռուսաստանը հետևողականորեն հանդես է գալիս Հարավային Կովկասում տնտեսական, տրանսպորտային և լոգիստիկ կապերի ապաշրջափակման օգտին։ Այս մասին հայտարարել է ՌԴ վարչապետ Միխայիլ Միշուստինը ՀՀ վարչապետ Նիկոլ Փաշինյանի հետ հանդիպմանը։
Նա համոզմունք է հայտնել, որ Հայաստանի, Ռուսաստանի և Ադրբեջանի ղեկավարների եռակողմ հայտարարություններին համապատասխան նոր ենթակառուցվածքային նախագծերի ստեղծումը կապահովի տարածաշրջանի կայուն տնտեսական զարգացումը և կամրապնդի մարդկանց միջև շփումները:
Միշուստինը նշել է, որ Մոսկվան բարձր է գնահատում Հայաստանի հետ բարեկամությունն ու դաշնակցային հարաբերությունները։ Չնայած արտաքին տնտեսական բարդ կոնյունկտուրային՝ Հայաստանի հետ Ռուսաստանի առևտրատնտեսական կապերն ամրապնդվում են, ապրանքաշրջանառությունն աճում է՝ եզրափակել է ՌԴ վարչապետը։
