Մարիետա Մարտիրոսյան (Գորիսի թիվ 3 նախադպրոցական ուսումնական հաստատության տնօրեն) - Շենքը գտնվում էր սարսափելի անբարեկարգ վիճակում, չհաշված, որ առաջին պատերազմի ժամանակ ռմբակոծվել է մի քանի անգամ:
18 բազմաբնակարան շենքերի թաղամասում գտնվող մանկապարտեզը նախատեսված է 180 երեխայի համար, սակայն անբարեկարգ վիճակում այստեղ միայն 120-ն է հաճախել: Նորոգման ավարտից հետո նախադպրոցական հաստատությունում ևս մեկ խումբ կբացվի: Ներքին հարդարումն ավարտվել է, կարգի է բերվում մանկապարտեզի արտաքին տեսքը: Նորոգման վերջին փուլում ամբողջությամբ կթարմացվի նաև հաստատության գույքը, նախատեսվում է մանկապարտեզի դռները վերաբացել ուսումնական տարվա սկզբին:
Գարեգին Փարսյան (Գորիսի համայնքապետարանի քաղաքաշինության և կոմունալ տնտեսության բաժնի պետ, գլխավոր ճարտարապետ) - Իր ամրացումներով, այսօրվա գործող բոլոր շինարարական նորմաներով կապիտալ վերանորոգում էր: Այսինքն՝ 4 պատից այն կողմ, մնացածը վերանորոգվել է:
Համայնքում գործող այս և այլ մանկապարտեզներում աշխատանք է իրականացվել նաև Լեռնային Ղարաբաղից տեղահանված ընտանիքների մանկահասակ երեխաների նախադպրոցական կրթությունն ապահովելու համար:
Իրինա Յոլյան (Գորիսի համայնքապետի տեղակալ) - Մենք այս տարի 10-ից ավելի նոր խմբեր ենք ստեղծել, նոր աշխատատեղեր: 200-ից ավելի երեխաներ նախադպրոցական կրթություն ստանալու հնարավորություն են ստացել:
Գորիսի թիվ 3 մանկապարտեզը նորոգվածներից միակը չէ՝ պետություն-համայնք և համայնք-մասնավոր գործակցությամբ մասամբ նորոգվել և նորոգվում է ևս 5 նախադպրոցական ուսումնական հաստատություն:
Հեղինակ՝ Նորայր Շողիկյան
