Մեկնարկել է «Կանեփ-կակաչ-2023» համալիր օպերատիվ-կանխարգելիչ միջոցառումը, որի նպատակն է շրջանառությունն արգելված թմրամիջոցներ պարունակող մշակած կամ վայրի աճած բույսերի հայտնաբերումն ու ոչնչացումը, ինչպես նաև թմրամիջոցների անօրինական շրջանառության դեպքերի կանխումը, հայտնաբերումն ու բացահայտումը:
Օգոստոսի 8-13-ն ընկած ժամանակահատվածում հանրապետության տարածքում հայտնաբերվել և այրման միջոցով ոչնչացվել է մոտ 15 տոննա կանեփի և 5 կգ կակաչի վայրի աճած զանգված:
Տնամերձ 78 հողամասում հայտնաբերվել է կանեփի 4834 բույս:
Օպերատիվ տեղեկությունների իրացման արդյունքում անցած շաբաթվա ընթացքում ապօրինի թմրաշրջանառությունից առգրավվել են՝ 5679 գրամ մարիխուանա, ավելի քան 4 գրամ մեթամֆետամին, 0,79 գրամ հաշիշ, 28 կիլոգրամ կանեփ և 3,21 գրամ սփայս տեսակի թմրամիջոցներ:
Ձեռնարկված օպերատիվ-հետախուզական միջոցների և բացատրական աշխատանքի արդյունքում հայտնաբերվել են տարբեր տրամաչափի 1366 փամփուշտ, 9 նռնակ ու նույնքան նռնակի պայթուցիչ, մեկ պահեստատուփ, 4 ատրճանակ, 2 ինքնաձիգ, 7 հրացան, մեկ ական և 10 արկ:
Միջոցառումների արդյունքում նաև հայտնաբերվել է 32 հետախուզվող:
«Կանեփ-կակաչ-2023» համալիր օպերատիվ-կանխարգելիչ միջոցառումը շարունակվում է:
