Ռաճայի երկրամասի Շովի առողջարանի տարածքում սողանքի հետևանքով զոհվածների հիշատակին Վրաստանում այսօր սուգ է հայտարարված։ Խոնարհվել են դրոշները, հեռուստաալիքներին արգելվել է հեռարձակել ժամանցային և երաժշտական հաղորդումներ։
Հիշեցնենք օգոստոսի 3-ին տեղի ունեցած սողանքի հետևանքով 18 մարդ զոհվել է, ևս 16-ը համարվում են անհետ կորած։ Վնասվել են կամուրջներ, ճանապարհներ, քոթեջներ, հյուրանոց։ Մասնագետների տվյալներով՝ լեռներից իջել է ավելի քան 5 մլն խմ հող։
ԲԼԻՆՔԵՆԸ ԵՎ ՖԻԴԱՆԸ ՔՆՆԱՐԿԵԼ ԵՆ ՏԱՐԱԾԱՇՐՋԱՆԱՅԻՆ ՀԱՐՑԵՐ
ԱՄՆ պետքարտուղար Էնթոնի Բլինքենը և Թուրքիայի ԱԳ նախարար Հաքան Ֆիդանը հեռախոսազրույցի ընթացքում քննարկել են միջազգային, տարածաշրջանային և երկկողմ հետաքրքրության մի շարք հարցեր:
Պաշտոնյաներն անդրադարձել են Հարավային Կովկասում իրադարձություններին, մասնավորապես` Հայաստանի ու Ադրբեջանի հարաբերությունների կարգավորման գործընթացին: Պետքարտուղարության հաղորդագրության համաձայն՝ Բլինքենն ընդգծել է կողմերի միջև խաղաղ բանակցությունների կարևորությունը:
Դիվանագետները քննարկել են նաև հացահատիկի գործարքի վերականգնումը, Սև ծովում անվտանգությունը և ՆԱՏՕ-ի ընդլայնումը:
ԿԻԵՎԻ ՀԵՏ ՀԱՄԱՁԱՅՆՈՒԹՅԱՆ ԳԱԼՈՒ ՀԻՄՔԵՐ ՉԿԱՆ. ՊԵՍԿՈՎ
Կիեևի հետ հակամարտության կարգավորման շուրջ համաձայնության գալու հիմքեր ներկայումս չկան՝ New York Times-ի հետ հարցազրույցում հայտարարել է ՌԴ նախագահի խոսնակը: «Տեսանելի ապագայում ռազմական գործողությունը կշարունակենք»,- նշել է Դմիտրի Պեսկովը։
Նա հավելել է, որ Մոսկվան ցանկանում է պահել վերահսկողությունը այն տարածքների հանդեպ, որոնք ամրագրված են Ռուսաստանի Սահմանադրությամբ: Կրեմլի խոսնակն այդպիսով նկատի է ունեցել Ղրիմը, Դոնեցկի և Լուգանսկի ինքնահռչակ հանրապետությունները, Խերսոնը և Զապորոժիեն:
Ըստ New York Times-ի՝ Պեսկովը բացառել է ուկրաինական նոր տարածքների գրավումը:
ՌՈՒՍ-ՈՒԿՐԱԻՆԱԿԱՆ ՀԱԿԱՄԱՐՏՈՒԹՅՈՒՆԸ՝ ՔՆՆԱՐԿՄԱՆ ԱՌԱՆՑՔՈՒՄ
Սաուդյան Արաբիայում օգոստոսի 5-6-ը ռուս-ուկրաինական հակամարտության կարգավորման հարցով խորհրդակցություններ են անցկացվել, որոնց մասնակցել են ներկայացուցիչներ մոտ 40 երկրից, այդ թվում՝ Ուկրաինայից, Թուրքիայից, ԱՄՆ-ից, Հարավային Կորեայից, Չինաստանից, Հնդկաստանից, Բրազիլիայից, Եգիպտոսից, եվրոպական պետություններից: Քննարկումներին ներկա են եղել նաև ԵՄ-ի և ՄԱԿ-ի ներկայացուցիչներ: Ռուսաստանը խորհրդակցություններին չի մասնակցել:
Արևմտյան լրատվամիջոցները, վկայակոչելով իրենց աղբյուրները, գրում են, որ Ջիդդայի հանդիպման մասնակիցներն ընդգծել են Ուկրաինայի տարածքային ամբողջականությանն աջակցելու, ինքնիշխանությունը հարգելու անհրաժեշտությունը։ Նշվում է, որ Սաուդյան Արաբիան ներկայացրել է խաղաղության հասնելու իր ծրագիրը, որը ենթադրում է աջակցություն Ուկրաինայի ամբողջականությանը, հրադադարի հաստատում, ՄԱԿ-ի վերահսկողության ներքո խաղաղ բանակցությունների մեկնարկ և գերիների փոխանակում:
Ըստ ԶԼՄ-ների՝ Չինաստանը կառուցողական մոտեցում է դրսևորել, բայց նաև առաջարկել է հաշվի առնել Մոսկվայի կարմիր գծերը և մտահոգությունները։
Մասնակիցները պայմանավորվել են շարունակել այս ձևաչափով խորհրդակցությունները: Էր Ռիադը հանդիպման ավարտից հետո կապվել է Մոսկվայի հետ և տեղեկացրել բանակցությունների ընթացքի մասին։
ՌՈՒՍԱՍՏԱՆՆ ԱԹՍ-ՆԵՐՈՎ ՀԱՐՎԱԾԵԼ Է ՈՒԿՐԱԻՆԱՅԻՆ
Ռուսաստանը տասնյակ անօդաչուներով զանգվածային հարվածներ է հասցրել Ուկրաինային։ Երկրի զինված ուժերի տվյալով՝ կան զոհեր և վիրավորներ։ Վոլոդիմիր Զելենսկին տեղեկացրել է, որ ռուսական բանակը թիրախավորել է Խարկովի արյան փոխներարկման կենտրոնը, ինչի հետևանքով խոշոր հրդեհ է բռնկվել, հայտնի է զոհերի մասին։
Ռուսական կողմն էլ հայտնել է, որ օգոստոսի 6-ի առավոտյան անօդաչու թռչող սարքը փորձել է ներթափանցել Մոսկվա, այն հաջողվել է խոցել: «Վնուկովո» օդանավակայանը թռիչքների սահմանափակումներ է մտցրել։ Ըստ ռուսական կողմի՝ ուկրաինական զորքերը գրոհել են նաև Ղրիմը Խերսոնի շրջանին կապող Չոնգարսկի կամուրջը, ինչպես նաև Գենիչեսկի կամուրջը, հայտնի է մեկ տուժածի մասին։
ՊԱԿԻՍՏԱՆՈՒՄ ԳՆԱՑՔԻ ՎԹԱՐԻ ՀԵՏԵՎԱՆՔՈՎ ԱՌՆՎԱԶՆ 30 ՄԱՐԴ Է ԶՈՀՎԵԼ
Պակիստանի հարավարևելյան Սինդ նահանգում գնացքի 10 վագոն դուրս է եկել ռելսերից: Վթարի պատճառով առնվազն 30 մարդ է զոհվել, տուժել է 80-ից ավելի մարդ՝ հայտնում են տեղական լրատվամիջոցները։
Շրջանի բուժհաստատություններում արտակարգ դրություն է հայտարարվել։ Գնացքի կործանման պատճառները դեռ հայտնի չեն:
