Միջազգային քրեական դատարանի Հռոմի կանոնադրությունը (Հռոմի ստատուտ) առաջիկայում ՀՀ կառավարությունը կներկայացնի Ազգային ժողովի վավերացմանը:
«Հռոմի ստատուտի հետ կապված՝ անցած շաբաթ աշխատակազմը, արդեն պատասխանելով ԶԼՄ հարցադրումներին, ներկայացրեց, որ առաջիկայում ուղարկելու է, կարծեմ շաբաթների հարց է»,- Կառավարության նիստից հետո լրագրողների հետ ճեպազրույցում ասաց արդարադատության նախարար Գրիգոր Մինասյանը:
Խոսելով ԲԴԽ նախագահ Կարեն Անդրեասյանի՝ դատավորների նկատմամբ ճնշումների վերաբերյալ ԶԼՄ-ների հայտարարությունների մասին՝ նախարարն ասաց.
«Կարեն Անդրեասյանի հետ կապված ԶԼՄ հայտարարությունները, իմ կարծիքով, բամբասանքներ են, նույնիսկ ընթացակարգային լավ չեն պատկերացնում՝ ԲԴԽ անդամի հետ կապված կարգավորումները որոնք են: Ուղղակի, իմ խորին համոզմամբ, պաշտպանվող կողմը բոլոր ձևերով փորձում է ակնհայտ կարգապահական գործի հետ կապված ինչ-որ մեկնաբանություններ անել, բայց դա իրենց պաշտպանական ստրատեգիան է:
Բնական է, որ իրավախախտները, որոնք ենթարկվել են պատասխանատվության, պետք է ինչ-որ ձևով պաշտպանվեն: Օրինակ՝ եթե մեկը մեղադրվում է կոռուպցիայի մեջ՝ որևէ չինովնիկ՝ նախկին կամ ներկա, ասում է, որ սա քաղաքական հետապնդում է, եթե դատավորը բռնվում է իրավախախտ գործունեության մեջ, պետք է ասի, որ ճնշում է: Բոլորն իրենց ձևով պաշտպանվում են: Նորմալ է, մենք էլ ժողովրդավար երկրում ենք, բոլորի կարծիքը լսում ենք, բայց չենք շեղվում մեր օրակարգից»:
Ինչ վերաբերում է ՀՀ նախկին նախագահներ Ռոբերտ Քոչարյանի և Սերժ Սարգսյանի՝ ազատության մեջ լինելուն, Գրիգոր Մինասյանն ասաց. «Ես համարում եմ, որ մեր երկրում անկախ նրանից, թե դու որ ժամանակաշրջանի պետական աշխատող ես եղել, և նաև անկախ նրանից, թե ում թիմից ես եղել, բոլորը պատժվելու են, եթե կատարել են հանցագործություն, և մեծ, ծանր գործերի դեպքում ավելի ծավալուն աշխատանք է սպասվում: Ինչն է լավ. որ գնալով՝ իրավապահ համակարգը է՛լ ավելի պրոֆեսիոնալ է դառնում, և ավելի դժվար է լինում սողանցքերով պատասխանատվությունից խուսափելը»:
