Հիփոթեքային վարկերի շուկայում, մեր դիտարկումներով, անցած տարվա ընթացքում եղել է տոկոսադրույքի աճ։ Ազգային ժողովի՝ հունիսի 15-ի նիստին այս մասին ասաց Կենտրոնական բանկի նախագահ Մարտին Գալստյանը։
«Կենտրոնական բանկը վերջին 2 տարվա ընթացքում վարել է զսպող դրամավարկային քաղաքականություն։ Բնականաբար, Կենտրոնական բանկի կողմից տոկոսադրույքների բարձրացումը հանգեցնում է նաև շուկայում այլ տիպի տոկոսադրույքների բարձրացման, ներառյալ նաև հիփոթեքները։ Սակայն հիփոթեքային վարկավորման տոկոսադրույքի աճը եղել է ավելի մեղմ, քան նույնիսկ Կենտրոնական բանկի վերաֆինանսավորման տոկոսադրույքի աճը»,- նշեց Գալստյանը։
Ինչ վերաբերում է անշարժ գույքի շուկային, ապա Մարտին Գալստյանը հաստատում է՝ տարիներ շարունակ Հայաստանի անշարժ գույքի շուկայում գների որոշակի աճ է նկատվում։
«Այս առումով 2 մեթոդ ունենք․ փորձում ենք հիմնականում համադրել մարդկանց իրական եկամուտների աճը ֆինանսական կամ ոչ ֆինանսական ակտիվների աճի հետ, ու մեր երկու մեթոդով էլ համադրելով՝ մենք տեսնում ենք, որ անշարժ գույքի շուկայում աճն ավելի բարձր է, քան իրական եկամուտների աճը, ուստի, մեր կարծիքով, կա որոշակի ավելի աճ (անշարժ գույքի շուկայում - խմբ.), քան պետք է լիներ»,- ասաց Գալստյանը։
