«Սահմանային միջադեպերը և մասնավորապես Երասխում կառուցվող գործարանի ուղղությամբ կրակոցները մտահոգիչ են, հատկապես որ դրանք ակտիվացած բանակցություններին զուգահեռ են»,- նշել է ԱԺ արտաքին հարաբերությունների հանձնաժողովի նախագահը: Թեմային անդրադարձել են նաև ֆինանսավարկային և բյուջետային հարցերի մշտական հանձնաժողովի նախագահն ու պաշտպանության փոխնախարարը:
ԱԴՐԲԵՋԱՆԻ ԶՈՒ ԿՐԱԿՈՑՆԵՐԻՑ ՎԻՐԱՎՈՐՎԵԼ Է ԵՐԿՈՒ ՕՏԱՐԵՐԿՐԱՑԻ
Արդեն երկրորդ օրն է՝ Ադրբեջանը կրակում է Երասխի հատվածում գտնվող հայկական դիրքերի և քաղաքացիական օբյեկտների վրա: Հիմնական նշանառության տակ կառուցվող խոշոր մետաղաձուլական գործարանն է: Այսօրվա կրակոցներից տուժել է տարածքում աշխատող Հնդկաստանի 2 քաղաքացի:
Արման Սարգսյան (ՀՀ պաշտպանության նախարարի տեղակալ) - Թե թիրախավորել են քաղաքացիների՞ն, թե՞ գործարանը՝ դա կպարզվի հետագայում:
ԱԴՐԲԵՋԱՆԸ ՓՈՐՁՈՒՄ Է ԱԳՐԵՍԻՎ ՎԱՐՔԱԳԻԾ ՑՈՒՑԱԲԵՐԵԼ. ԽԱՆԴԱՆՅԱՆ
ԱԺ արտաքին հարաբերությունների մշտական հանձնաժողովի նախագահի դիտարկմամբ՝ ԵՄ քաղաքացիական առաքելությունը արձանագրում է այդ իրավիճակը, բացի այդ՝ հայկական կողմը միջազգային հարթակներում ևս ներկայացնում է սահմանային միջադեպերը:
Սարգիս Խանդանյան (ՀՀ ԱԺ արտաքին հարաբերությունների մշտական հանձնաժողովի նախագահ) - Ես խորհրդարանական մակարդակում նաև Կոնգրեսի գործընկերներին եմ տեղեկացրել միջադեպի մասին: Իհարկե մտահոգիչ է, հատկապես որ դրանք զուգահեռ են ընթանում ակտիվացած բանակցային գործընթացին, և մենք կրկին տեսնում ենք Ադրբեջանի վարքագիծը, որ բանակցություններին ընդառաջ փորձում է հողի վրա ագրեսիվ վարքագիծ ցուցաբերել:
ԳՈՐԾԱՐԱՆԻ ԿԱՌՈՒՑՈՒՄԸ ՁԱԽՈՂԵԼՈՒ ԱԴՐԲԵՋԱՆԻ ՓՈՐՁԵՐԸ
Այս հատվածում լարվածությունը մեծացավ, երբ հայտարարվեց, որ Երասխում 70 մլն դոլարով հայ-ամերիկյան ներդրմամբ կառուցվում է խոշոր մետաղաձուլական գործարան: Այն տարեկան թողարկելու է 180 հազար տոննա արտադրանք, ունենալու 1000 աշխատատեղ: Գործարանի կառուցման նորությանն առաջիններից արձագանքեց Ադրբեջանի բնապահպանության նախարարությունը՝ նշելով, թե այն բացասական ազդեցություն կունենա Ադրբեջանի շրջակա միջավայրի վրա, ինչին արձագանքել էր Հայաստանի շրջակա միջավայրի նախարարությունը:
ՇՄՆ
«Գործարանի շահագործման արդյունքում շրջակա միջավայրի վրա բացասական անդրսահմանային ազդեցությանը վերաբերող Ադրբեջանի հայտարարությունն անհիմն է և որևէ կերպ չի համապատասխանում իրականությանը»։
Կառուցվող մետաղաձուլարանի սեփականատեր «Ջի Թի Բի սթիլ» ընկերությունը նույնպես անդրադարձավ ադրբեջանական մեղադրանքներին:
«Ջի Թի Բի սթիլ» ՍՊԸ
«Ընկերությունը ՀՀ օրենսդրությամբ սահմանված կարգով դիմել և ստացել է շրջակա միջավայրի վրա ազդեցության դրական եզրակացություն, որով հաստատվել է՝ ներդրվելու են շրջակա միջավայրի նկատմամբ բացասական ազդեցության բացառման բոլոր ժամանակակից տեխնոլոգիաները, ու իրականացվելու են բոլոր համարժեք միջոցառումները»։
Ադրբեջանի բնապահպանական հերթական կեղծ ահազանգի իրական նպատակը Հայաստանի տնտեսական զարգացումը խոչընդոտելն է՝ համոզված է ԱԺ պատգամավոր Գևորգ Պապոյանը:
Գևորգ Պապոյան - ՀՀ-ն իր տարածքում իրավասու է միջազգային նորմերին համապատասխանող ցանկացած գործարան կառուցել: Իսկ այդ գործարանն այդ նորմերին է համապատասխանում: Նույն տրամաբանությամբ՝ Բաքվի նավթահանքերը վնասում են Հայաստանի բնական միջավայրը: Մենք արդեն խոսում ենք ոչ թե հանքարդյունահանող արդյունաբերության մասին, այլ մշակող արդյունաբերության մասին, որը ենթադրում է շատ ավելի շատ աշխատատեղեր, ավելացված արժեքի հարկ, հարկեր, տնտեսական պոտենցիալի ավելացում, ինչը, բնականաբար, Ադրբեջանին ձեռք տալ չի կարող:
Պապոյանի կարծիքով՝ Ադրբեջանին նյարդայնացրել է նաև հանգամանքը, որ ներդրումը հայ-ամերիկյան է: Եթե այն հաջողի, դրան կարող են հաջորդել եվրոպական և ամերիկյան շատ այլ ներդրումներ:
Գևորգ Պապոյան - Կարծում եմ, որ ամերիկյան կողմը պետք է որոշակի պատշաճ գնահատականի արժանացնի, որովհետև ներդրողներից մեկն ԱՄՆ քաղաքացի է, մյուս ներդրողը Ամերիկայում տնտեսական գործունեություն է իրականացնում:
Մետաղաձուլական գործարանի կառուցումը շարունակվելու է՝ անկախ՝ հարևան պետությունը բնապահպանական կեղծ պատճառաբանություններ կբերի՞, թե՞ սահմանային սադրանքներ կհրահրի՝ նշում են պատգամավորները: Երասխի մետաղաձուլական գործարանը ծավալի և տեխնոլոգիաների առումով ոլորտում նմանը չունի և նպաստելու է Հայաստանի ինքնաբավության մակարդակի բարձրացմանը:
